ޤައުމީ ފުޓްބޯޅަޓީމުގެ ކޯޗް ސުޒެއިން އިސްތިއުފާދީފި
ޤައުމީ ސީނިއާ ފުޓްބޯޅަ ޓީމުގެ ހެޑް ކޯޗްގެ މަޤާމުން އަލީ ސުޒެއިން މިއަދު އިސްތިއުފާދީފިއެވެ.
ސުޒެއިން މަގާމުން އިސްތިއުފާދީފައިމިވަނީ މިއަދު އޭޝިއަންކަޕް ކޮލިފިކޭޝަނުގައި ދިވެހިރާއްޖެއާ ޓިމޯ ލެސްޓޭ ބައްދަލުކުރިމެޗަށްފަހުއެވެ. މިމެޗް 0-1 ނަތީޖާއަކުން ކާމިޔާބުކުރީ ޓިމޯ ލެސްޓޭއެވެ.
ޤައުމީޓީމުން އިސްތިއުފާދޭނޭކަން ސުޒެއިން އިއުލާނުކުރީ މެޗަށްފަހު ބޭއްވި ނޫސްވެރިންގެ ބައްދަލުވުމުގައެވެ. ސުޒެއިން ބުނީ މެޗުން ޓީމް ބަލިވުމުގެ ޒިންމާ އޭނާ ނަގާކަމަށާއި، މިއީ ޤައުމީ ފުޓްބޯޅަ ޓީމާ އެހެން މީހަކު ހަވާލުވާންޖެހޭ ވަގުތު ކަމަށެވެ.
އިސްތިފާ ދޭނޭކަން އިއުލާނުކުރުމަށްފަހު ސޯޝަލް މީޑިއާގައި ކުރި ޕޯސްޓެއްގައި ކޯޗް ސުޒެއިްނ ބުނީ، މިއަދު ކުޅުނު މެޗްގެ ނަތީޖާއަކީ ވަރަށް ދަށް ނަތީޖާއެއްކަމަށް ގަބޫލުކުރާކަމަށާއި، ދިވެހި ފުޓްބޯޅަ އާއިލާގެ ކިބައިން މައާފަށް އެދޭކަމަށެވެ. ދިވެހި ފުޓްބޯޅައިގެ ހާލަތު އުނދަގޫ ދުވަސްވަރެއްގައި ކޯޗެއްގެ ގޮތުގައި ހޭދަކުރި ދުވަސްތަކަކީ ލިބުނު ވަރަށްބޮޑު ޝަރަފަކާ އުފަލެއްކަމަށްވެސް ކޯޗް ވަނީ ފާހަގަކޮށްފައެވެ.
ޤައުމީޓީމުގެ ކޯޗްކަމުގެ މަގާމާ ސުޒޭން ހަވާލުވީ ކުރިން އެމަޤާމުގައި ހުރި އިޓަލީގެ ފްރެންޗެސްކޯ މޮރިއޭރޯ އާއެކު ހަދާފައިވާ އެއްބަސްވުން ހަމަވުމުންނެވެ. ސުޒެއިން މިއަދު އިސްތިއުފާދިންކަން އިއުލާނުކުރިއިރު، އެފްއޭއެމްގެ ނޯމަލައިޒް ކޮމިޓީން ވަނީ މީގެ ކުރިންވެސް ޤައުމީޓީމަށް ކޯޗަކު ހޯދަން އިއުލާނުކޮށްފައެވެ.
Advertisement
This content is created and paid for by advertisers and does not involve Voice Journalists
