ވޯލްޑްކަޕް ކޮލިފައިންގައި އަންގާރަ ދުވަހުގެ ރޭ ރަށުން ބޭރުގައި އާޖެންޓީނާ އާއި 1-1 ގެ ނަތީޖާއަކުން އެއްވަރުވެ، ވޯލްޑްކަޕްގެ ޖާގައެއް ކަށަވަރުކުރުމަށް ލިބުނު ފުރުސަތު ކޮލަމްބިއާ އިން ނަގާލިއިފިއެވެ.

މިނަތީޖާއެކު ކޮލިފައިންގައި ކުޅުނު 16 މެޗުން އާޖެންޓީނާއަށް 35 ޕޮއިންޓް ލިބިފައިވާއިރު، އެޓީމު މިވަގުތު އޮތީ ކޮލިފައިންގް ތާވަލުގެ އެއްވަނައިގައެވެ. އަދި މިމެޗަށް ނިކުތުމުގެ ކުރިން ވެސް އެޓީމުން ވަނީ ވޯލްޑްކަޕްގެ ޖާގައެއް ކަށަވަރުކޮށްފައެވެ. އަދި މިމެޗުން ލިބުނު އެއްޕޮއިންޓާއެކު 16 މެޗުން ކޮލަމްބިއާއަށް 22 ޕޮއިންޓް ލިބިފައިވާއިރު އެޓީމު މިވަގުތު ތާވަލުގެ ހަ ވަނައިގައެވެ.

ކޮލިފައިންގައި އާޖެންޓީނާ އެންމެ ފަހުން ކުޅުނު މެޗުގައި ޗިލީ އަތުން 1-0 ގެ ނަތީޖާއަކުން މޮޅުވެފައިވާއިރު، ކޮލަމްބިއާ އިން އެންމެ ފަހުން ޕެރޫ އާއި ދެކޮޅަށް ކުޅުނު މެޗު ނިމިފައިވަނީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން އެއްވަރުވެފައި އޮވެގެންނެވެ. އަދި މިދެޓީމު އެންމެ ފަހުން ކުޅުނު މެޗު 1-2 ގެ ނަތީޖާއަކުން ކާމިޔާބުކުރީ ކޮލަމްބިއާ އިންނެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަމަ ލަނޑުޖަހައި ކުރިހޯދީ ކޮލަމްބިއާ އިންނެވެ. މިލަނޑު ފުރަތަމަ ހާފުގެ 24 ވަނަ މިނެޓުގައި ކާމިޔާބުކޮށްދިނީ ފޯވާޑް ލުއިސް ޑިއާޒް އެވެ. މިއީ އެޓީމުގެ މިޑްފީލްޑަރު ކެވިން ކަސްޓާނޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ކޮލަމްބިއާ ކުރީގައި އޮވެގެންނެވެ.

މެޗުގެ ދެވަނަ ހާފުގަައި އާޖެންޓީނާއަށް އިތުރު މައްސަލަތަކެއް ކުރިމަތިވީ ފަހުހާފުގެ 70 ވަނަ މިނެޓުގައި އެޓީމުގެ މިޑްފީލްޑަރު އެންޒޯ ފެނާންޑޭޒް ކުރި ނުރައްކާތެރި ފައުލަކާއި ގުޅިގެން މެޗުގެ ރެފްރީ ވަނީ އޭނާއަށް ސީދާ ރަތް ކާޑެއް ދައްކައި ދަނޑުން ފޮނުވާލާފައެވެ. މިއާއެކު މެޗުގެ ބާކީބައި އެޓީމުން ފުރިހަމަ ކުރީ އެއްކުޅުންތެރިއަކު މަދުކޮށެވެ.

އެކަކު މަދުކޮށް ކުޅެމުން އާޖެންޓީނާ އިން މެޗުގެ ނަތީޖާ އެއްވަރުކުރި ލަނޑު ފަހުހާފުގެ 84 ވަނަ މިނެޓުގައި ކާމިޔާބުކޮށްދިނީ ތިއާގޯ އަލްމަޑާ އެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.