އެމެރިކާގައި މިހާރު ކުރިއަށްދާ ފީފާ ކުލަބު ވޯލްޑްކަޕް 2025 ގެ ކުޅުން ރޭ ފެށިއިރު މިބާރާތުގެ ފުރަތަމަ މެޗުގައި ގުރޫޕް އޭގެ އިންޓަ މިއާމީ އާއި އަލް އަހްލީ ވާދަކުރި މެޗު ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމު އެއްވަރު ވެއްޖެއެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަަތަމަ ހާފުގައި ގިނަ ވަގުތު ބޯޅަ ހިފަހައްޓައިގެން ކުޅެ އަލް އަހްލީ އިން މެޗު ޑޮމިނޭޓްކުރިއިރު މިހާފުގައި އެޓީމުން ވަނީ އިންޓަ މިއާމީގެ ގޯލަށް ގިނަ ހަމަލާތަކެއް ފޮނުވާލަފައެވެ.

އޭގެ ތެރެއިން އެއް ފުރުސަތެއްގައި ފުރަތަމަ ހާފުގެ 31 ވަނަ މިނެޓުގައި އަލް އަހްލީ އިން ލަނޑެއްވެސް ކާމިޔާބުކުރިއެވެ. ނަމަވެސް ރެފްރީ ނިންމީ އެއީ އޮފްސައިޑް ލަނޑެއްކަމަށެވެ. އަދި ފުރަތަމަ ހާފުގެ 43 ވަނަ މެޗުގައި އެޓީމަށް ވަނީ މެޗުގެ ލީޑު ހޯދުމަށް ޕެނަލްޓީއެއް ވެސް ލިބިފައެވެ.

ނަމަވެސް އެޓީމުގެ ތަޖްރިބާކާރު މިޑްފީލްޑަރު ޓެލެޒެގޭޓް ކުރިއަށް ފޮނުވާލި ޕެނަލްޓީ އިންޓަ މިއާމީގެ ކީޕަރު އޮސްކާ އަސްޓާރީ ވަނީ ދިފާއުކޮށްފައެވެ. އަދި މިއާއެކު ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި އިންޓަ މިއާމީ އިން ވަނީ އެޓީމުގެ ކުޅުންރަނގަޅުކޮށް ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. އެގޮތުން މިހާފު ނިމެންދަނިކޮށް އިންޓަ މިއާމީގެ ކެޕްޓަން ލިޔޮނަލް މެސީ ފޮނުވާލި ބާރު ހަމަލާއެއް އަލް އަހްލީގެ ކީޕަރު އަތުގައި ޖެހިފައި ހުރަސް ދަނޑިއަށް އަމާޒުވިއިރު، މެޗުގެ އެންމެ ފަހު މިނެޓުގައި އެޓީމު ޑިފެންޑަރު މެކްސިމިލިއާނޯ ފަލްކަން މުޅި ހުސްކޮށްހުރެ ބޮލުން ފޮބުވާލި ބޯޅަ ވެސް އަހްލީގެ ކީޕަރު ވަނީ ހުޝިއާރުކަމާއެކު ދިފާޅުކޮށްފައެވެ.

މިމުބާރާތުގައި މިއަހަރު ޖުމްލަ 32 ޓީމަކުން ވާދަކުރަމުން އަންނައިރު، މުބާރާތް ކުރިއަށްދަނީ ބައިވެރިވި 32 ޓީމު ހަތަރު ޓީމުގެ އަށް ގުރޫޕަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމަށް މުބާރާތުގެ ރައުންޑް އޮފް 16 އިން ޖާގަ ލިބިގެންދާނެއެވެ.