އެމެރިކާގައި މިހާރު ކުރިއަށްދާ ކުލަބް ވޯލްޑްކަޕް ފުޓްބޯޅަ މުބާރާތުގެ ގުރޫޕް އެފްގައި ހޮނިހިރު ދުވަހުގެ ރޭ ކުޅުނު މެޗުގައި ސައުތު އެފްރިކާގެ މެމްލޯޑީ ސަންޑައުންސް އިން ލަނޑެއް ކާމިޔާބުކޮށް ލީޑު ހޯދާފައި ވަނިކޮށް ފަހަތުން އަރައި 4-3 ގެ ނަތީޖާއަކުން މޮޅުވެ ބޮރޫޝިޔާ ޑޯޓްމަންޑުން ގުރޫޕްގެ އެއްވަނައަށް ކުރިއަށް ޖެހިލައިފިއެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ދެމެޗުން ޑޯޓްމަންޑަށް ހަތަރު ޕޮއިންޓް ލިބިފައިވާއިރު، އެޓީމު މިވަގުތު އޮތީ ގުރޫޕްގެ އެއްވަނައިގައެވެ. އަދި މިމެޗުން ބަލިވި މެމްލޯޑީސަންޑައުންސް ކުޅުނު ދެމެޗުން ހޯދި ތިން ޕޮއިންޓާއެކު އެޓީމު މިވަގުތު އޮތީ ގުރޫޕްގެ ދެވަނައިގައެވެ.

މުބާރާތުގައި ޑޯޓްމަންޑް ކުޅުނު ފުރަތަމަ މެޗުގައި ބްރެޒިލްގެ ފްލެމިނެންސް އާއި ވާދަކޮށް 0-0 ގެ ނަތީޖާއަކުން ދެޓީމު އެއްވަރުވެފައިވާއިރު، މެމްލޯޑީ ސަންޑައުންސްގެ ފުރަތަމަ މެޗުގައި އެޓީމުން ވަނީ 1-0 ގެ ނަތީޖާއަކުން ސައުތު ކޮރެއާގެ އުލްސާން އެޗްޑީ ބަލިކޮށްފައެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު މިމެޗުގައި ފުރަތަމަ ލަނޑުޖަހައި ކުރިހޯދީ މެމްލޯޑީސަންޑައުންސް އިންނެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެލަނޑުގެ ލީޑަކާއެކު 3-1 ގެ ނަތީޖާއަކުން ޑޯޓްމަންޑް ކުރީގައި އޮވެގެންނެވެ. އަދި މެޗު ދެވަނަ ހާފުގައި މޮޅަށްކުޅެ މެމްލޯޑީސަންޑައުންސް އިން އިތުރު ދެލަނޑު ކާމިޔާބުކުރިއިރު މިހާފުގައި ޑޯޓްމަންޑް އިން ވެސް ވަނީ އިތުރު އެއްލަނޑު ކާމިޔާބުކޮށްފައެވެ.

އެގޮތުން މިމެޗުގައި ޑޯޓްމަންޑްގެ ސެރްހޫ ގްރާސީ، ފެލިކްސް މަކާ، ޖޯބް ބެލިންހަމް މިއިން ކޮންމެ ކުޅުންތެރިޔަކު އެއްލަނޑު ކާމިޔާބުކުރިއިރު، އެޓީމުގެ އަނެއް ލަނޑަކީ މެމްލޯޑީސަންޑައުންސްގެ ޑިފެންޑަރު ޚުލިސޯ މުޑޯ އަތުން ބައިކޮޅަށް ވަން ލަނޑެކެވެ.

މީގެ އިތުރުން މިމެޗުގައި މެމްލޯޑީސަންޑައުންސްގެ ލޫކަސް ރިބެއިރޯ ކޯސްޓާ، އިކްރާމް ރޭނަރސް އަދި ލެބޯ މޮތިބާ މިއިން ކޮންމެ ކުޅުންތެރިޔަކު ވަނީ މިމެޗުގައި އެއްލަނޑު ކާމިޔާބުކޮށްފައެވެ. އަދި މެޗުގެ މޮޅު ކުޅުންތެރިޔަކަށް ހޮވުނީ ޑޯޓްމަންޑްގެ އިނގިރޭސި މިޑްފީލްޑަރު ޖޯބް ބެލިންހަމް އެވެ.