ހުޅުމާލެ2 ގެ ވިނަރެސް ފްލެޓުގެ އެޕާޓްމަންޓެއްގައި މިއަދު ހެނދުނު ހިނގި އަލިފާނުގެ ހާދިސާއާ ގުޅިގެން، އެތަނުގައި ދިރިނޫޅެވޭވަރަށް ގެއްލުން ލިބިފައިވާ ކަމަށް ނޭޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން ބުނެފި އެވެ.
އެމްއެންޑީއެފް އިން މިއަދު މައުލޫމާތު ދެމުން ބުނީ، ވިނަރެސް ފްލެޓް 9 ގެ 13 ވަނަ ފަންގިފިލާގެ ހަ ވަނަ އެޕާޓްމަންޓުން ދުން އަރާކަމުގެ މައުލޫމާތު މިއަދު ހެނދުނު 7:41 ހާއިރު ލިބިފައިވާ ކަމަށެވެ.
އަދި އަލިފާން ރޯވެފައިވަނީ ގޮދަޑިއެއްގައި ކަމަށާ، ރޯވި އަލިފާން ހެނދުނު ނިއްވާލާފައިވާ ކަމަށެވެ.
އެމްއެންޑީއެފުން އިތުރަށް ބުނީ މިހާދިސާގައި އެއްވެސް މީހަކަށް އަނިޔާއެއް ލިބިފައި ނިވާ ކަމަށެވެ. އެހެން ނަމަވެސް، އެ ހާދިސާ ހިނގި ކޮޓަރީގެ އެނދަށް ގެއްލުންވެފައިވާއިރު، އެނދުގައި އޮތް ގޮދަޑި އޮތީ އެއްކޮށް އަނދާފައެވެ.
އޭގެ އިތުރުން، މުޅި އެޕާޓްމަންޓަށް ކަޅު ދުމުގެ އަސަރުކޮށް، ކޮޓަރިތެރޭގައި ހުރި ފަރުނީޗަރުތަކަށާއި އޭސީއަށް އެކިވަރުގެ ގެއްލުންތައް ލިބިފައިވާ ކަަމަށް އެމްއެންޑީއެފުން ބުނެއެވެ.
އެކަމާ ގުޅިގެން އެންޑީއެމްއޭއިން ބުނީ އެ އޮތޯރިޓީން އެކަން ބަލަމުންދާ ކަމަށާ، އަލިފާން ރޯވި އެޕާޓްމަންޓްގައި ދިރިއުޅޭ 4 މީހަކަށް 5 ދުވަހުގެ މުއްދަތަށް ވަގުތީ ބޯހިޔާވަހިކަމާއި ކެއުން އަދި 2 މީހަކަށް އަންނައުނު ފޯރުކޮށްދީފައިވާ ކަމަށެވެ.
Advertisement
This content is created and paid for by advertisers and does not involve Voice Journalists
