އުރީދޫއިން ރާއްޖޭގައި މުޅިން އަލަށް ބާއްވާ އުރީދޫ ނޭޝަން އެޓޯލް އީސްޕޯޓްސް ލީގަށް ރަޖިސްޓްރީވުމުގެ ފުރުސަތު ހުޅުވާލައިފިއެވެ.

މި މުބާރާތަކީ ރާއްޖޭގެ އެކިކަންކޮޅުތަކުން ރަށްރަށުގެ ޓީމްތައް ރަޖިސްޓަރީ ކުރެވިގެން ކުރިއަށް ގެންދެވޭ ޕަބްޖީ މުބާރާތެކެވެ. މި މުބާރާތަކީ އޮންލައިންކޮށް ކުރިއަށްގެންދާ މުބާރާތެއްކަމަުން އަމިއްލަ ރަށުގައި ހުރެގެން އީސްޕޯޓްސް މުބާރާތެއްގައި ބައިވެރިވުމުގެ ފުރުސަތު ފަހިކޮށްދެވޭ ފުރަތަމަ މުބާރާތެވެ.

އުރީދޫ ނޭޝަން އެޓޯލް ސްޕޯޓްސް ލީގަކީ ހަތަރު މަރުހަލާއަކަށް ބަހާލައިގެން ކުރިއަށް ގެންދާ މުޅިން އޮންލައިން މުބާރާތެކެވެ. މި މުބާރާތުގައި ހިމެނޭ ހަތަރު ސްޓޭޖަކީ އައިލެންޑް ކޮލިފައިން، ކުއާޓާ ފައިނަލްސް، ސެމީ ފައިނަލްސްގެ އިތުރުން ގްރޭންޑް ފައިނަލްސްއެވެ.

މި މުބާރާތުގައި ބައިވެރިވުމުގެ ފުރުސަތު ހުޅުވާލައިފާ ވަނީ މި މަހުގެ 16 ވަނަ ދުވަހުގައެވެ. އަދި މުބާރާތުގައި ބައިވެރިވުމުގެ އެންމެފަހު ދުވަހަކީ އަންނަ ޖުލައި މަހުގެ 4 ވަނަ ދުވަހެވެ.

ޖުމްލަ 50،000 ރުފިޔާގެ ފައިސާގެ އިނާމް ލިބޭ ޕްރައިޒް ޕޫލް:

- ޗެމްޕިއަން: 25،000 ރުފިޔާ

- 2 ވަނަ: 12،000 ރުފިޔާ

- 3 ވަނަ: 6،000 ރުފިޔާ

- 4 ވަނަ: 3،000 ރުފިޔާ

- އެމްވީޕީ: 4،000 ރުފިޔާ

އުރީދޫއިން ބުނީ މި މުބާރާތުގައި ކޮންމެ ޓީމަކަށް ވެސް މަދުވެގެން 6 ކުޅުންތެރިން ހިމަނަންވާނެ ކަމަށެވެ. އަދި ޓީމަށް ނަންދިނުމުގައި އެއް ރަށަކުން ގިނަ ޓީމްތަކެއް ބައިވެރިވާ ނަމަ، ޓީމް ނަންތަކުގައި ރަށުގެ ނަން (މިސާލަކަށް އޭބީސީ ކާށިދޫ، ޑީއީއެފް ކާށިދޫ) ހިމަނަންވާނެކަމަށް އުރީދޫއިން ވަނީ ބުނެފައެވެ. މީގެ އިތުރުން ކޮންމެ ޓީމެއްގައި ގިނަވެގެން ރަށުން ބޭރު ދެ ކުޅުންތެރިން ހިމެނިދާނެއެވެ.

އުރީދޫ ނޭޝަން އެޓޯލް އީސްޕޯޓްސް ލީގުގެ މައިގަނޑު މަގުސަދަކީ ރާއްޖޭގެ އެކި ކަންކޮޅުތަކުގައި ތިބި ލޯކަލް ގޭމިން ކޮމިއުނިޓީތައް ފާހަގަކޮށް، ޒުވާނުންނާއި ޝައުގުވެރިވާ ފަރާތްތަކަށް ފުރުސަތުތައް ފަހިކޮށްދޭ އިންކްލޫސިވް ޑިޖިޓަލް ސްޕޭސްތަކެއް އުފެއްދުމެވެ.