ސްޓެލްކޯގެ އިންހައުސް ޓްރެއިނަރސް ޕޫލް އިފްތިތާހުކޮށްފި
ސްޓެލްކޯގެ އިންހައުސް ޓްރެއިނަރސް ޕޫލް އެ ކުންފުނީގެ މެނޭޖިންގ ޑިރެކްޓަރ ޙުސައިން ފަހުމީ މިއަދު އިފްތިތާހުކޮށްދެއްވައިފިއެވެ.
ސްޓެލްކޯ އިން އެކްސްގައި ކޮށްފައިވާ ޕޯސްޓެއްގައި ބުނެފައިވަނީ އިންހައުސް ޓްރެއިނަރސް ޕޫލަކީ ސްޓެލްކޯގެ މުވައްޒަފުންގެ ޢިލްމާއި ހުނަރާއި ތަޖުރިބާ ބޭނުންކޮށްގެން ކުންފުނީގެ މުވައްޒަފުންނަށް އިންޓަރނަލް ޓްރެއިނިންގއާއި މުވައްޒަފުންނަށް ބޭނުންވާ ހުނަރު ދެނެގަނެ އެ މުވައްޒަފުންނަށް ބޭނުންވާ ޢިލްމު އެންމެ ގާތުން ފޯރުކޮށްދިނުމަށް ފެށުނު މަސައްކަތެއްކަށެވެ.
ސްޓެލްކޯއިން ހާމަކޮށްފައިވާ ގޮތުގައި އެކުންފުނީގެ 35 މުވައްޒަފަކު ވަނީ ޓްރެއިން ދަ ޓްރެއިނަރ އިންޓަރނޭޝަނަލް ސެޓްފިކެޓް ހާސިލްކޮށްފައެވެ.
ސެޓްފިކެޓް ހާސިލްކޮށްފައިވާ ސްޓެލްކޯގެ މުވައްޒަފުންނަށް އެކުންފުނިންވަނީ ސެޓިފައިޑް ޓްރެއިނަރެއްގެ ލައިސަންސް ދެވިފައި ކަމަށް އެކުންފުނިން ވަނީ ބުނެފައެވެ. އަދި ޓްރެއިނަރސް ޕޫލް ހިންގުމަށް ހަމަޖެހިފައިވާ ޓްރެއިނިންގތަކުގެ މައުލޫމާތު ހިމެނޭ އަތްމަތީ ފޮތް މި ރަސްމިއްޔާތުގައި ވަނީ ނެރެފައެވެ.
ސްޓެލްކޯގެ ޓްރެއިނަރސް ޕޫލްގައި މިވަގުތު ތިބި 35 ޓްރެއިނަރުންގެ ތެރޭގައި އެކި ދާއިރާތަކުގެ އިންޖީނިއަރުން، ޓެކްނީޝަނުން، އިދާރީ އެކި ދާއިރާތަކާއި، ހިއުމަން ރިސޯސްއާއި، ސެކިއުރިޓީއާއި، މީޑިއާގެ އިތުރުން ޕަބްލިކް ރިލޭޝަންސް ދާއިރާ ފަދަ ގިނަ ދާއިރާތަކަށް ހާއްސަ މުވައްޒަފުން ހިމެނެއެވެ.
Advertisement
This content is created and paid for by advertisers and does not involve Voice Journalists
