ކޮންމެ ހުކުރު ދުވަހަކު ހެނދުނު ނުވަޔަކާ ހަމައަށް ބައެއް މަގުތަކުގައި ވެހިކަލް ދުއްވުން މަނާކުރަން ނިންމާ އެކަމާއި ގުޅޭ މަސައްކަތް މާލެ ސިޓީ ކައުންސިލުން މިއަދު ފަށައިފި އެވެ.
މާލެ ސިޓީ ކައުންސިލްގައި މިއަދު އޮތް އެ ކައުންސިލްގެ 200 ވަނަ ބައްދަލްވުމުގައި މާލޭގެ މޭޔަރު އާދަމް އާޒިމް ވަނީ ހުކުރު ދުވަހުގެ ހެނދުނު ވަގުތުތަކުގައި މާލޭގެ ބޮޑެތި މަގުތައް ފިޔަވާ އެހެން މަގުތަކުގައި ވެހިކަލް ދުއްވުން މަނާކޮށް އެއީ ކުޑަކުދީންނާއި އާއިލާތަކަށް މަގުތަކަށް ނިކުމެ ރައްކާތެރިކަމާއެކު ހިނގާ ބިނގާވެ އުޅެވޭނެ ވަގުތަކަށް ހެދުމަށް އެކަމާއި ގުޅޭ ނިންމުމެއް ނިންމުމަށް ހުށައަޅާފަ އެެވެ.
މޭޔަރު ހުށައެޅުއްވީ ފަތިހު 5:30 އިން ފެށިގެން ހެނދުނު 9:00 އާ ހަމައަށް މާލެއާ ވިލިމާލޭގެ ކުދިމަގުތަކާއި ގޯޅިތަކުގައި ވެހިކަލް ނުދެއްވޭ ގޮތަށް ހަމަޖެއްސުމަށެވެ. ހުުކުރު ދުވަހުގެ އެ ވަގުތަކީ ޓްރެފިކް ބާރުބޮޑު ގަޑިތަކެއް ނޫން ކަން ފާހަގަ ކުރައްވާ އާޒިމް ވިދާޅުވީ އެކަމުން ގިނަ ބަޔަކަށް ބޮޑު ފަސޭހައެއް ލިބޭނެ ކަމަށެވެ.
އަދި އާއިލާތަކާއި ހާއްސަކޮށް ކުޑަކުދީންނަށް އެކަމުން ވަރަށް ބޮޑު އުފަލެއް ލިބޭނެކަން ފާހަގަ ކުރެެއްވި އެވެ.
ޑެޕިއުޓީ މޭޔަރު މުހައްމަދު އަރީޝް ވެސް ވަނީ އެކަމަށް ތާއީދު ކޮށްފަ އެވެ. ނަމަވެސް މަގުތައް ބަންދުކުރާ ގަޑި ހެނދުނު ހަޔަކުން ނުވަޔަކަށް ހަމަޖެއްސުމަށް ހުށައެޅި އެވެ.
އެހެން ކަމުން އެކަމާއިމެދު ފުލުހުންނާއި މަޝްވަރާކޮށް ކޮންމެ ހުކުރު ދުވަހަކު ހެނދުނު ނުވަޔަކާ ހަމައަށް ބައެއް މަގުތަކުގައި ވެހިކަލް ދުއްވުން މަނާކުރަން ނިންމާ އެކަމާއި ގުޅޭ މަސައްކަތް ކުރިއަށް ގެންދަން ވަނީ ނިންމާފަ އެވެ.
Advertisement
This content is created and paid for by advertisers and does not involve Voice Journalists
