އިމިގްރޭޝަނުން އައްޑޫ ސިޓީއަށް ހާއްސަކޮށްގެން ކުރިއަށްގެންދާ މި އަހަރުގެ އެންމެ ބޮޑު އެއް ރެއިޑް، "އޮޕަރޭޝަން ހަމަމަގު" ގައި މިހާތަނަށް ވަރކް ވިސާ ނެތި އުޅުނު 83 މީހަކު އެ އިދާރާގެ ބެލުމުގެ ދަށަށް ގެންގޮސްފިއެވެ.

އިމިގްރޭޝަނުން އައްޑޫސިޓީގައި ކުރިއަށްގެންދާ އޮޕަރޭޝަނާ ގުޅޭގޮތުން އެންމެފަހުން އެކްސްގައި އާއްމުކުރި މައުލޫމާތަށް ބަލާއިރު، އިއްޔެ އެކަނިވެސް 678 ބިދޭސީއަކު ވަނީ ބަލައި ފާސްކޮށްފައެވެ. އޭގެ ތެރެއިން 83 މީހުން ވިސާނެތި ގަވައިދާ ހިލާފަށް މަސައްކަތް ކުރަމުންދިޔަކަން ވަނީ ފާހަގަކުރެވިފައެވެ. އިމިގްރޭޝަނުން ވަނީ މި އޮޕަރޭޝަނުގައި މިހާތަނަށް ސައްހަ ވިސާ ނެތި ބިދޭސީން ލައްވައި މަސައްކަތްކުރުވި 75 ފަރާތަކަށް ނޯޓިސްދީފައެވެ.

އައްޑޫސިޓީގައި އިއްޔެ ކުރިއަށްގެންދިޔަ މި އޮޕަރޭޝަނުގައި ކޮންޓްރޯލަރ ޖެނެރަލް އޮފް އިމިގްރޭޝަން،ސީ.ޕީ (ރޓ) އަޙްމަދު ފަޞީޙް އަދި ޑެޕިއުޓީ ކޮންޓްރޯލަރ އަޙްމަދު އަޝްފާން ބައިވެރިވެ ވަޑައިގެންނެވިއެވެ. އަދި 35 އިމިގްރޭޝަން އޮފިސަރުންނާއި އައްޑޫ ސިޓީ ފުލުހުންގެ އިތުރުން، އައްޑޫ ސިޓީ ކައުންސިލް މެންބަރުންވެސް ބައިވެރިވެ ވަޑައިގެންނެވިއެވެ.

އިމިގްރޭޝަނުން ބުނެފައިވަނީ އިއްޔެ ހެނދުނުން ފެށިގެން އިރުއޮއްސުމާ ހަމައަށް ކުރިއަށް ގެންދިޔަ މި އޮޕަރޭޝަންގައި ގަވާއިދާ ޚިލާފަށް އައްޑޫ ސިޓީގައި މަސައްކަތް ކުރަމުންދިޔަ ބިދޭސީން ރާއްޖެއިން ފުރުވާލުމަށްޓަކައި އިމިގްރޭޝަންގެ ބެލުމުގެ ދަށަށް މާލޭގެ ޑިޓެންޝަން ސެންޓަރަށް ގެނެވޭނެ ކަމަށެވެ.

ގަވައިދާ ހިލާފަށް އުޅެމުންގެންދާ ބިދޭސީން އަތުލައިގަތުމަށް އިމިގްރޭޝަނުން ފަށާފައިވާ މަސައްކަތްތަކުގެ ދަށުން އެ އިދާރާއިން ދަނީ ރައްޖޭގެ އަތޮޅުތަކުގައިވެސް އޮޕަރޭޝަންތައް ހިންގަމުންނެވެ. އެގޮތުން މިހާތަނަށް އަތުލައިގަތް ބައެއްމީހުން ވަނީ ޑީޕޯޓްކޮށް އަނެއްބަޔަކު ވަނީ ގަވައިދުގެ ތެރެއަށް ވަނުމުގެ ފުރުސަތު ދީފައެވެ.