ބަދަލު ހިފުމުގެ ރޫޙެއް އަޅުގަނޑުގެ ނޯންނާނެ ކަން ނަޝީދަށް ވެސް އެނގޭނެ: ޞާލިޙް
އެމަނިކުފާނަކީ ބަދަލު ހިފުމުގެ ރޫޙު ގެންގުޅުއްވާ ބޭފުޅެއް ނޫން ކަމަށާ، އެކަން ކުރީގެ ރައީސް މުޙައްމަދު ނަޝީދަށްވެސް އެނގިލައްވާނެ ކަމަށް ކުރީގެ ރައީސް، އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރާއްޖެ ޓީވީގެ ފަލަ ސުރުޙީ ޕްރޮގްރާމްގައި ވާހަކަ ދައްކަވަމުން ރައީސް ޞާލިޙް ވަނީ ރައީސް ނަޝީދާއި ޑިމޮކްރެޓްސްގެ މެންބަރުންތައް އެނބުރި އެމްޑީޕީއަށް ސޮއި ކުރައްވާފައިވާތީ އެކަމާއި ގުޅިގެން އެމަނިކުފާނު ދެކެވަޑައިގަންނަވާ ގޮތް ހިއްސާ ކުރައްވާފައެވެ.
އެގޮތުން ވިދާޅުވީ، އެމްޑީޕީ ދޫކޮށް ދިޔަ ބޭފުޅުން އެނބުރި ވަޑައިގެންނެވުމުން އުފާ ކުރައްވާ ކަމަށެވެ. އަދި އެމަނިކުފާނަކީ ބަދަލު ހިއްޕަވާނެ ބޭފުޅެއްނޫން ކަމަށެވެ.
ބަލި ކަށި މީހުން ބަދަލު ހިފާނީ، ސްޓްރޯންގް މީހުން މާފުކުރާނެ، އިންޓެލިޖެންޓް މީހުން އިގްނޯ ކުރާނީ، ހަމަ ގައިމުވެސް ބަދަލު ހިފުމެއް އަޅުގަނޑުގެ ނޯންނާނެ. ރައީސް ނަޝީދަށްވެސް އެނގިވަޑައިގަންނަވާނެ އެކަން.
އިބްރާހީމް މުޙައްމަދު ޞާލިޙް
ރައީސް ޞާލިޙް ވިދާޅުވި ގޮތުގައި، ޑިމޮކްރެޓްސް އެ ޕާޓޫ ދޫކޮށް އެމްޑީޕާ ގުޅުމަކީ އެމަނިކުފާނު ވަރަށް އުފާކުރައްވާ ކަމެއް ކަމަށެވެ. އަދި އެ ދެޕާޓީ އަކީވެސް ގާތްގަނޑަކަށް އެއް ވިސްނުމެއް ގެންގުޅޭ ދެ ޕާޓީ ކަމަށާ، އެކުގައި މަސައްކަތް ކުރަން މީގެ ކުރިންވެސް މަޝްވަރާ ކުރެވުނު ކަމަށް އެމަނިކުފާނު ވިދާޅުވުއެވެ.
އަޅުގަނޑުމެން ރިޔާސީ އިންތިޚާބުން ބަކިވުމާއެކީގައި، ދުވަސްކޮޅެއްގެ ތެރޭގައި، ޑިމޮކްރެޓްސްއާ އެމްޑީޕީއާ ދެމެދުގައު ވާހަކަތަކެއް ދެކެވުނު. އޭރު ގެންގުޅުނު އެއް ވިސްނުމަކީ ޑިމޮކްރެޓްސް އާ އެކީގައި ކޯލިޝަނެއް ހަދައިގެން ދެބައިމީހުން އެކީގައި ދެ ޕާޓީ އޮވެގެން ކުރިއަށް ދާން. އެ ޚިޔާލު އަޚުގަނޑާ ހިސާބަށް ގެނައިމަ، ފުރަތަމަ ދުވަހުވެސް އަޅުގަނޑު ބުނިން އަޅުގަނޑަށް ގަބޫލެއް ނުކުރެވެއޭ ތިކަމެއް. ޑިމޮކްރެޓްސް އާއި އެމްޑީޕީ އަދި ގައުމަށްވެސް އެންމެ ރަނގަޅު ގޮތަކީ ޑިމޮކްރެޓްސްގެ ބޭފުޅުން އެނބުރި އެމްޑީޕީއަށް ވަޑައިގަތުމޭ.
އިބްރާހީމް މުޙައްމަދު ޞާލިޙް
ޞާލިޙް ވިދާޅުވީ، ޑިމޮކްރެޓްސްގެ މެންބަރުން އެމްޑީޕީއާ ގުޅުމާމެދު އެމްޑީޕީގެ ލީޑާޝިޕްގެ ބޭފުޅުންގެ މެދުގައި ޚިޔާލުތަފާތުވުންތައް އޮތް ކަމަށެވެ. އެހެން ނަމަވެސް ކަން ނިމިގެން ދިޔައީ އެމަނިކުފާނު އޭރު ބޭނުންވެވަޑައިގެންނެވި ގޮތަށް ކަމަށާ، އެކަމުގެ ސަބަބުން އެމްޑީޕީ އިތުރަށް ވަރުގަދަ ވެގެންދާނެ ކަމަށް ވިދާޅުވިއެވެ.
އެހެންކަމުން ދެން އޮތީ އެކުގައި މަސައްކަތް ކުރުން ކަމަށާ، ”ފަހަތަށް އެނބުރިގޮސް އެ މާޒީގައި ތާށިވެ ތިބެން ނުވާނެ“ ކަމަށާ، އެމްޑީޕީ ކުރަން ނުކުމެ ތިބީ މާ ބުރަ މަސައްކަތެއް ކަމަށް ޞާލިޙް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
