ވެވަޑައިގެންފައިވާ ވައުދުފުޅާ އެއްގޮތަށް، ރާއްޖޭގައި ރިސޯޓްތައް މަދު އަތޮޅުތަކަށް ޓޫރިޒަމް ފުޅާކުރުމުގެ މަސައްކަތް ފަށަން ތައްޔާރުވެފައިވާ ކަމަށް ރައީސުލްޖުމްހޫރިއްޔާ ޑރ. މުުހައްމަދު މުޢިއްޒު އިއުލާނު ކުރައްވައިފި އެވެ.

އެމަނިކުފާނު އެކަން އިއުލާނު ކުރެއްވީ އެކްސްގައި ކުރެއްވި ޕޯސްޓެއްގަ އެވެ.

އެ ޕޯސްޓްގައި ރައީސް ފުރަތަމަ ވިދާޅުވީ ވިދާޅުވީ މި އަހަރު މަޖިލީސް ހުޅުވުމުގެ ގޮތުން އިއްވެވި ރިޔާސީ ބަޔާނުގައި މިހާރު ޓޫރިޒަމް އެންމެ ދަށް އަތޮޅުތަކުގައި ރިސޯޓްތައް ހުޅުވާ ޓޫރިޒަމް ފުޅާކުރައްވަން ވައުދުވެވަޑައިގެންނެވި ކަމަށެވެ.

ރައީސް ވިދާޅުވީ ވެވަޑައިގެންފައިވާ ވައުދުފުޅާ އެއްގޮތަށް، ރާއްޖޭގައި ރިސޯޓްތައް މަދު އަތޮޅުތަކަށް ޓޫރިޒަމް ފުޅާކުރުމުގެ މަސައްކަތް ފަށަން ތައްޔާރުވެފައިވާ ކަމަށެވެ. 

އެގޮތުން ރިސޯޓްތައް އެންމެ މަދު ހަ އަތޮޅު ކަމަށްވާ ހއ އަތޮޅާއި ހދ އަދި ށ އަތޮޅާއި ތ އަތޮޅާއި ލ އަދި އައްޑޫ ހިމެނޭނެހެން ފުރުސަތުތައް ހުޅުވާލަން ތައްޔާރު ވަމުންދާ ކަމަށް ވިދާޅުވި އެވެ.

ރައީސް ވިދާޅުވި ގޮތުގައި މި ހަ އަތޮޅުތަކުގައި ޓޫރިޒަމަށް ރަށްތައް ހުޅުވާލާނީ މާކެޓިން ސްޓްރެޓެޖީއަކާ އެކު އެވެ. އަދި ވިދާޅުވީ އިންވެސްޓްމަންޓްތަކަށް ހިތްވަރު ދީ ޓޫރިޒަމްގެ ދާއިރާގެ އިތުރު އިގްތިސާދީ ހަރަކާތްތައް ހިންގުމަށް ހިތްވަރު ލިބޭ ގޮތަށް އެ ފުރުސަތުތައް ފަހި ކުރައްވާނެ ކަމަަށެވެ.

މިކަމާ ގުޅޭ އިތުރު މައުލޫމާތު ކުރިއަށް އޮތް ހަފުތާގެ ތެރޭގައި މިނިސްޓްރީ އޮފް ޓޫރިޒަމް އެންޑް އެންވަޔަރަމަންޓުން ހާމަކުރާނެ ކަމަށް ވެސް ވިދާޅުވި އެވެ.

މި ޕޯސްޓްގެ ކުރީން ރައީސް ވަނީ ދިވެހިރާއްޖޭގެ ފަތުރުވެރިކަމުގެ ސިނާއަތު އިތުރަށް ފުޅާކޮށް، ޙަލާލް ޓޫރިޒަމްގެ ދާއިރާގައި ކުރިއަރާފައިވާ މަންޒިލަކަށް ހެދުމަށްޓަކައި، ބައެއް ރަށްތައް ހަމައެކަނި ޙަލާލް ޓޫރިޒަމަށް ޚާއްސަކޮށް ތަރައްޤީ ކުރުމަށް ނިންމާފައިވާ ކަން އިއުލާނު ކުރައްވާފަ އެވެ.

އެގޮތުން އެ ރަށްތަކަަށް އިންވެސްޓަރުންނަށް ޚާއްސަ ލުއިތަކެއް ދިނުމަށް ވެސް ވަނީ ނިންމާފައިވާ ކަމަށް ވިދާޅުވި އެވެ. މީގެ ސަބަބުން ދިވެހިރާއްޖޭގެ ފަތުރުވެރިކަމުގެ އިތުރު ހަރުފަތަކަށް ގެންދެވި އެ ސިނާއަތް ފުޅާވެގެންދާނެ ކަމަށް އެމަނިކުފާނު ވިދާޅުވި އެވެ.