ކުރިއަށްއޮތް 24 ގަޑިއިރުގެ ތެރޭގައި ދިޔަވަރު ބޮޑުވާ ގަޑިތަކުގައި އުދައެރުން އެކަށީގެންވާކަމަށް މޫސުމާ ބެހޭ ޤައުމީ އިދާރާއިން ލަފާކޮށްފިއެވެ.
މޯލްޑިވްސް މީޓިއޮލޮޖިކަލް ސެންޓަރުން ބުނީ އުދަ އަރާނޭކަމުގެ އިންޒާރެއް އަދި މިހާތަަނަށް ލިބިފައި ނެތްނަމަވެސް ދިޔަވަރު ބޮޑުވާ ގަޑިތަކުގައި އުދައިގެ އަސަރުކުރުން ވަރަށް ގާތްކަމަށެވެ. މިދިޔަ 24 ގަޑިއިރުގެ ތެރޭގައި ދިޔަވަރު އެންމެ ބޮޑުވެގެންދިޔަ ގަޑީގައި ބައެއް ރަށްތަކަށް ވަނީ އުދަ އަރާފައެވެ.
މެޓް އޮފީހުން ބުނީ މިއަދު ރައްޖޭގެ އެކި ސަރަހައްދުތަކަށް ގުގުރުމާއެކު ވިއްސާރަ ކުރާނޭކަމަށް ލަފާކޮށްފައެވެ. އެގޮތުން ހއ އަތޮޅުން ފެށިގެން އދ އަތޮޅާ ހަމަޔަށް ވަނީ ހުދު ސަމާލުވެސް ނެރެފައެވެ.
މިއަދު ހެނދުނު އައި ވިލާގަނޑުގައި މާލެ އަތޮޅުގެ ބައެއް ރަށްތަކަށް ވަނީ ވާރޭ ވެހިފައެވެ. މިގޮތުން ބައެއް ރަށްރަށުގައި ހިނގާ ބިނގާވެ އުޅެން ދަތިވާވަރަށް ވިއްސާރަ ވެހުނުކަން ފާހަގަކޮށްލެވެއެވެ.
ކ.ތުލުސްދޫއަށް ވާރޭ ވެހެނީ... ފޮޓޯ: ވޮއިސް
ހިނގަމުން މިދަނީ ހުޅަނގު މޫސުމުގެ 6 ވަނަ ނަކަތް ކަމަށްވާ އަދަ ނަކަތެވެ. މި މޫސުމުގައި ޢާންމުކޮށް ދަތުރުފަތުރު ކުރެވޭ ވަރަށް ވުރެ ކަނޑުތައް ގަދަވާނޭކަމަށް އިހުގެ ބައެއް މީހުން ބުނެއެވެ. މި ނަކަތަކީ މަސްވެރިކަން ރަނގަޅު މަސްއައިންތައް ގިނައިން ފެންނަ ނަކަތެއް ކަމަށްވެސް އެމީހުން ފާހަގަކުރެއވެެ.
Advertisement
This content is created and paid for by advertisers and does not involve Voice Journalists
