މިމަހު 26 ވަނަ ދުވަހުގެ ރޭ ރ.އަތޮޅު ފައިނުގައި ހިނގި އެކްސިޑެންޓްގައި އަނިޔާވި 2 ކުދިންނަށް ވެންޓިލޭޓަރުން ނަގާފައިވާ ކަމަށާ، ނަމަވެސް ޓީޗަރަށް އަދިވެސް ފަރުވާ ދެމުންދަނީ ވެންޓިލޭޓަރުގައި ކަމަށް އައިޖީއެމްއެޗުން ބުނެފިއެވެ.
ވޮއިސްއާ މައުލޫމާތު ހިއްސާކުރަމުން އައިޖީއެމްއެޗުން ބުނީ، އަނިޔާވި ދެކުދިން ވެންޓިލޭޓަރުން ނެގި ނަމަވެސް، އަދިވެސް ފަރުވާ ދެމުންދަނީ އައިސީޔޫގައި ކަމަށެވެ.
އަދި ޓީޗަރަށް އަދިވެސް ފަރުވާ ދެމުންދަނީ އައިސީޔޫގައި ވެންޓިލޭޓަރުގައި ކަމަށްވެސް ބުނެފައިވެއެވެ.
ފައިނުގައި ހިނގި މި އެކްސިޑެންޓް ހިނގާފައިވަނީ ލައިސަންސް ނެތް ދަރިވަރަކު ދުއްވި ސައިކަލެއް ކަސްރަތަށް ނިކުމެ އުޅުނު ދެ މީހެއްގެ ގައިގައި ޖެހިގެންނެވެ.
އެކްސިޑެންޓް ހިނގިއިރު ސައިކަލްގައި އިނީ ސްކޫލް ދެ ދަރިވަރުންނެވެ. ދުއްވާފައި ދިޔަ ސައިކަލް ގޮސް ޖެހުނު އެކަކީ ފައިނު ސްކޫލްގެ ޕްރިންސިޕަލެވެ. އަދި ދެވަނަ މީހަކީ ސްކޫލް ޓީޗަރެކެވެ.
ވޮއިސްއާ މައުލޫމާތު ހިއްސާކުރި ފައިނު ރައްޔިތަކު ބުނީ، އެކްސިޑެންޓްވި ސީނަށް ބަލާއިރު ސައިކަލް ދުއްވާފައިހުރީ ވަރަށް ބާރަށްކަމަށެވެ.
މި އެކްސިޑެންޓްގައި އަނިޔާލިބުނު މީހުން އިތުރު ފަރުވާދިނުމަށް މާލެ ގެނެސްފައިވަނީ މިމަހު 27 ވަނަ ދުވަހުއެވެ. އެކްސިޑެންޓް ހިނގުމާއެކު އަނިޔާވި މީހުންނަށް ފަރުވާދީފައިވަނީ އުނގޫފާރު ރީޖަނަލް ހޮސްޕިޓަލުންނެވެ.
މި އެކްސިޑެންޓްގައި ހަތަރު މީހުންނަށްވެސް ވަނީ އެކިވަރުގެ އަނިޔާތައް ލިބިފައެވެ. ފުލުހުން ވަނީ އެކްސިޑެންޓްވި ސައިކަލް ޓޯ ކޮށް، މައްސަލަ ބަލަން ފަށާފައެވެ.
Advertisement
This content is created and paid for by advertisers and does not involve Voice Journalists
