ގަވާއިދާ ހިލާފަށް ދިވެހިރާއްޖޭގައި ދިރިއުޅެމުންދާ ބިދޭސީންގެ މައްސަލައަށް ދާއިމީ ހައްލެއް ގެނައުމުގެ ގޮތުން އާބާދީ ބޮޑެތި ރަށްރަށުގައި އިމިގްރޭޝަނުގެ އޮޕަރޭޝަންތަކެއް ފަށައިފިއެވެ.
އިމިގްރޭޝަނުގެ ތަފާސްހިސާބުތަކުން ދައްކާގޮތުގައި މިހާތަނަށް އިމިގްރޭޝަނުންވަނީ ގަވާއިދާ ހިލާފަށް ރާއްޖޭގައި ދިރިއުޅެމުންދިޔަ 6،700 އަށްވުރެ ގިނަ ބިދޭސީން ޑީޕޯޓްކޮށްލައިފައެވެ. އިމިގްރޭޝަނުން ބުނެފައިވާ ގޮތުގައި މާލޭ ސަރަހައްދުގައި ފެށި މި އޮޕަރޭޝަން ރާއްޖޭގެ އާބާދީ ބޮޑު އެހެން ސަރަހައްދުތަކަށް ފުޅާކޮށްފައި މިގޮތަށް އުޅޭ ބިދޭސީންގެ މައްސަލަ އެންމެ ބޮޑީ މާލެއަށް ފަހު އާބާދީގެ ގޮތުން ބޮޑެތި ރަށްރަށުގައި ކަމަށް ވާތީއެވެ.
ފާހަގަކޮށްލަންޖެހޭ ގޮތުގައި އިމިގްރޭޝަނުން ވަނީ އައްޑޫ ސިޓީގައި ރެއިޑް އޮޕަރޭޝަންތަކެއް ކުރިއަށްގެންގޮސް ގަވާއިދާ ހިލާފަށް އުޅެމުންދިޔަ 83 ބިދޭސީން އިމިގްރޭޝަނުގެ ބެލުމުގެ ދަށަށް ގެންގޮސްފައެވެ.
އިމިގްރޭޝަނުން ބުނެފައިވާ ގޮތުގައި މި ރެއިޑް އޮޕަރޭޝަންތަކުގެ އެންމެ ބޮޑު އެއް މަގުސަދަކީ ރާއްޖޭގައި ގަވާއިދާ ހިލާފަށް އުޅެމުންދާ ބިދޭސީންގެ މައްސަލައަށް އަވަސް ހައްލެއް ހޯދައިދިނުމާއި އާންމު ސިއްހަތަށް ނުރައްކާވާ ކަންކަން މަދުކޮށް ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށްދިނުމެވެ.
ފާހަގަކޮށްލަންޖެހޭ ގޮތުގައި ގަވާއިދާ ހިލާފަށް ދިވެހިރާއްޖޭގައި އުޅެމުންދާ ބިދޭސީންގެ މައްސަލައަކީ އަބަދުވެސް ރާއްޖޭގައި ބޮޑުވެފައި އޮތް ހައްލު ނުކުރެވިފައި އޮތް ބޮޑު މައްސަލައެކެވެ. ސަރުކާރުންނާއި އިމިގްރޭޝަން އަދި ކަމާ ގުޅުން ހުރި އިދާރާތަކުން ގުޅިގެން މަސައްކަތް ކުރެވިއްޖެނަމަ ގަވާއިދާ ހިލާފަށް ރާއްޖޭގައި އުޅެމުންދާ ބިދޭސީންގެ މައްސަލައަށް ކުރިއަށް އޮތްތަނުގައި ހައްލު ލިބިގެންދާނެ ކަމަށް އިމިގްރޭޝަނުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
