ބ.ތުޅާދޫގައި ހަލުވިކަމާއެކު ރޯގާ ފެތުރެމުންދާތީވެ، ރައްޔިތުން ގޭގައިތިބުމަށް އެރަށު ކައުންސިލުން އިލްތިމާސްކޮށްފިއެވެ.
ތުޅާދޫ ކައުންސިލުން މިއަދު ނެރެފައިވާ ބަޔާނެއްގައި ބުނެފައިވަނީ، އެރަށުގައި ރޯގާ އާއި ޑެންގޫ ފެތުރެމުންދާ މިންވަރު ހަލުވިކަމާއެކު އިތުރުވަމުންދާކަމަށެވެ. އެހެންކަމުން މިދުވަސްވަރު ކޮންމެހެން ދާންޖެހޭ ތަނެއް ފިޔަވައި އިތުރު ތަންތަނަށް ނުގޮސް ގޭގައި މަޑުކުރުމަށާއި، ރޯގާގެ އަލާމާތެއް ފެނިއްޖެނަމަ ލަސްނުކޮށް ސިއްހީމަރުކަޒުން ދީފައިވާ އިރުޝާދާ އެއްގޮތަށް އަމަލުކުރަން އަންގާކަމަށެވެ.
ތުޅާދޫ ކައުންސިލުން މިއަދު ވަނީ ޑެންގޫ ހުމާއި ރޯގާ ފެތުރެމުންދާތީވެ، ކައުންސިލުން ވަކި އެއްޗެއް އަންގަންދެން ފުޓްސަލް ދަނޑުވެސް ބޭނުންނުކުރުމަށް އަންގާފައެވެ. އެރަށު ކައުންސިލުން ބުނީ ފުޓްސަލްދަނޑު ބަންދުކުރަން ނިންމީ އެ ސަރަހައްދުގައި ކުނިކޮށި ހުރުމުގެ ސަބަބުންނާއި، އެ ސަރަހައްދުގައި ގިނަ އަދަދަކަށް މަދިރި އާއި މަދިރިފަނި އާލާވާކަމަށް ފާހަގަކުރެވޭތީވެ، ރައްޔިތުންގެ ސަލާމަތަށް އަޅާ ފިޔަވަޅެއްގެ ގޮތުން ކަމަށެވެ.
ވޮއިސްއަށް މައުލޫމާތު ލިބިފައިވާ ގޮތުގައި މިހާރު ދުވާލެއްގެ މައްޗަށް 80 އަށް ވުރެ ގިނަ މީހުން އެރަށު ސިއްހީމަރުކަޒަށް ފަރުވާ ހޯދުމަށް ދެއެވެ. އާއްމު ދުވަހެއްގައިނަމަ މީގެ ކުރިން މިއަދަދު އުޅެނީ 20 ގައެވެ. މީގެ އިތުރުން ތުޅާދޫ ސްކޫލުގެ ކިޔެވުންވެސް އިންޓަރވަލް ފަހުން ވަނީ ބަންދުކޮށްފައެވެ. ރޯގާގެ ސަބަބުން ސްކޫލުގެ ގިނަ އަދަދެއްގެ ޓީޗަރުން ސަލާމްގައި ތިބިއިރު، ދަރިވަރުންގެވެސް ދެބައިކުޅަ އެއްބައި ސްކޫލަށް ހާޒިރު ނުވާކަމަށް މައުލޫމާތު ލިބެއެވެ.
މާލެއާއި އަތޮޅުތަކުގެ ރަށްތަކުގައި ރޯގާ އާއި ޑެންގޫ ހުން ފެތުރެމުންދާ މިންވަރު ވަރަށްބޮޑަށް އިތުރުވަމުންދާކަމަށް ކަމާބެހޭ ފަރާތްތަކުންވެސް ވަނީ ފާހަގަކޮށްފައެވެ. މީގެ އިތުރުން ކޮވިޑް ފެތުރެމުންދާ މިންވަރު އިތުރުވަމުންދާތީވެ އެކަމަށް ސަމާލުވުމަށްވެސް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ވަނީ އިލްތިމާސްކޮށްފައެވެ.
Advertisement
This content is created and paid for by advertisers and does not involve Voice Journalists
