މޯލްޑިވްސް އެއާޕޯޓްސް ކޮމްޕެނީގެ އަމާޒަކީ އަލަށް ހުޅުވުމަށް ހަމަޖެހިފައިވާ ޓާމިނަލާއެކު ލިބެމުން އަންނަ ފައިދާ އިތުރުކުރުންކަމަށް، އެކުންފުނީގެ ސީއީއޯ އަދި މެނޭޖިން ޑިރެކްޓަރު އިބްރާހީމް ޝަރީފް މުޙައްމަދު ވިދާޅުވެއްޖެއެވެ.

ހުޅުލޭ އައިލެންޑް ހޮޓަލުގައި މިއަދު ބޭއްވި އެމްއޭސީއެލްގެ 2024 ވަނަ އަހަރީ އާއްމު ޖަލްސާގައި ވާހަކަދައްވަމުން ޝަރީފް ވިދާޅުވީ، އެކުންފުނީގެ އަމާޒަކީ އާ ޓާމިނަލް އާއެކު ކުންފުނިން ދެމުން އަންނަ ޚިދުމަތްތައް އިތުރުކޮށް، ޚިދުމަތުގެ ފެންވަރު ރަނގަޅުކޮށް، ކުންފުނީގެ ފައިދާ އިތުރުކުރުން ކަމަށެވެ. އެގޮތުން އާ ޓާމިނަލް ވެގެންދާނީ ރާއްޖޭގެ ފަތުރުވެރިކަމަށް ލިބިގެންދާނެ އިންގިލާބީ ބަދަލެއް ކަމަށް އޭނާ ވިދާޅުވިއެވެ.

އެމްއޭސީއެލަށް މިދިޔަ އަހަރު އާމްދަނީގެ ގޮތުގައި 7.2 ބިލިއަން ރުފިޔާ ވަނީ ލިބިފައެވެ. ސާފް ފައިދާގެ ގޮތުގައި ލިބިފައިވަނީ 1.1 ބިލިއަން ރުފިޔާއެވެ. މިއީ 2023 ވަނަ އަހަރާ އަޅާބަލާއިރު، 32.2 އިންސައްތައިގެ ކުރިއެރުމެކެވެ.

ޝަރީފް ވިދާޅުވީ އެމްއޭސީއެލުން މިދިޔަ އަހަރު ހޯދި ކާމިޔާބީއަކީ ކުންފުނީގެ އެންމެން ގުޅިގެން ކުރި މަސައްކަތުގެ ނަތީޖާ ކަމަށެވެ. ޝަރީފް ވަނީ އެގޮތުގައި ކުރިއަށްދާނެކަމުގެ ފުރިހަމަ ޔަގީންކަން ކުންފުނީގެ ބޯޑަށާއި މެނޭޖުމަންޓަށް އަރުވާފައެވެ.

އެމްއޭސީއެލްގެ އަހަރީ އާއްމުޖަލްސާގެ ތެރެއިން... ފޮޓޯ: އެމްއޭސީއެލް

މި ޖަލްސާގައި ވާހަކަފުޅު ދައްކަވަމުން އެމް.އޭ.ސީ.އެލްގެ ޗެއާޕާސަން އައިޝާ ނޫރައިން ޖަނާޙް ވިދާޅުވީ އެމް.އޭ.ސީ.އެލް އިން ފާއިތުވި އަހަރު ހޯދާފައިވާ ކާމިޔާބީތަކަކީ ކުންފުންޏަށް ލިބިގެންދިޔަ ބޮޑު ކުރިއެރުމެއް ކަމަށެވެ. އަދި އެމް.އޭ.ސީ.އެލްގެ ކުރިމަގު ފެންނަނީ އުޖާލާކޮށް ކަމަށާއި އުންމީދަކީ ކުންފުންޏަށް އިތުރު ކާމިޔާބީތައް ލިބިގެންދިއުން ކަމަށް އޭނާ ވިދާޅުވިއެވެ.

އެމް.އޭ.ސީ.އެލުން މިވަގުތު އެކުންފުނިން އެންމެ އިސްކަމެއް ދީގެން ކުރިއަށް ގެންދާ މަސައްކަތަކަކީ އާ ޕެސެންޖަރ ޓާމިނަލް ހުޅުވުމުގެ މަސައްކަތެވެ. އައު ޕެސެންޖަރ ޓާމިނަލް ހުޅުވިގެންދާއިރު، އެތަނު ޚިދުމަތްތައް ފުޅާކޮށް އިތުރު ހަރުފަތަކަށް ގެންދިއުމަށްޓަކައި  އުމްރާނީ ގިނަ ވަސީލަތްތަކެއް ގާއިމްކޮށްފައިވާކަމަށް އެކުންފުނިން ބުނެއެވެ.