މިހާރު އެމެރިކާގައި ކުރިއަށްދާ ކުލަބު ވޯލްޑްކަޕް ފުޓްބޯޅަ މުބާރާތުގެ އިންތިޒާމުތަކާއި މެދު ކުލަބުތަކުން ހިތްހަމަމުޖެހުން ފާޅުކޮށް ފީފާއަށް ޝަކުވާ ހުށަހަޅާފައިވާކަމަށް މީޑިއާ ރިޕޯޓްތައް ބުނެފިއެވެ.

އެގޮތުން ކޯޕް އިން ރިޕޯޓްކޮއްފައިވާ ގޮތުގައި ގުރޫޕް ސްޓޭޖުގައި ސަލްޒްބާގް އަތުން މޮޅުވި މެޗަށްފަހު އިންތިޒާމްކުރާ ފަރާތުގެ އިހުމާލުން ރެއާލް މެޑްރިޑަށް ބަހުގައި ހަ ގަޑިއިރު މަޑުކުރަން ޖެހުނެވެ.

އެންމެ ފުރަތަމަ ކުޅުންތެރިން މަޑުކުރަން ޖެހުނީ ސްޓޭޑިއަމް ކައިރީގައި، އެއަށްފަހު އެއާޕޯޓުގައި ވެސް އެތައްއިރަކު މަޑުކުރަންޖެހުނެވެ. ނަތީޖާއެއްގެ ގޮތުން ޒަބީ އަލޮންސޯ އާއި އޭނާގެ ޓީމު އެނބުރި ހޮޓަލަށް ދެވުނީ ރާއްޖެ ގަޑިން ފަތިހު 5:00 އެހާކަންހާއިރު ކަމަށާއި، ކުރިއަށް އޮތް ޓްރެއިނިން ސެޝަންގެ ކުރިން އެ ޓީމަށް އަރާމުކޮށް ރިކަވާވާން އެކަށީގެންވާ ވަގުތު ނުލިބޭ ކަމަށެވެ.

ރެއާލް މެޑްރިޑުން ހިތްހަމަ ނުޖެހި، ފީފާގެ އިންތިޒާމާ މެދު ނުރުހުން ފާޅުކޮށްފައިވާ ކަމަށާއި އިންތިޒާމްކުރާ ފަރާތްތައް ރަނގަޅަށް ތައްޔާރުވެފައި ނުވާތީ އޭގެ ސަބަބުން ކުޅުންތެރިންނާއި ކޯޗިން ސްޓާފުންނަށް އޭގެ ސަބަބުން ނޭދެވޭ އަސަރު ކުރާކަމަށް އެކުލަބުން ވަނީ ބުނެފައެވެ.

މީގެ އިތުރުން މުބާރާތުގެ ދެވަނަ ބުރުގައި ރޭ ޗެލްސީ އާއި ބެންފީކާ ވާދަކުރި މެޗުގެ 85 ވަނަ މިނެޓުގައި އުޑުމަތި ބަނަވެ ވިއްސާރަވުމުން މެޗުގެ ކުޅުން ދެގަޑިއެއްހާ އިރަށް މެދުކަނޑާލަމަށްފަހު ބާކީ އޮތް ފަސް މިނެޓް އަޅުން ކުޅެންޖެހުމުން ޗެލްސީގެ ކޯޗް ވެސް ވަނީ ހިތްހަމަނުޖެހުން ފާޅުކޮށްފައެވެ.

މެޗަށްފަހު ޗެލްސީގެ ކޯޗު ބުނީ މިއީ ފުޓްބޯޅައެއް ނޫން ކަމަށާއި މީގެ ކުރިން މިކަހަލަކަމެއް ތަޖުރިބާކުރަން ނުޖެހޭކަމަށެވެ. މި މުބާރާތުގައި މީގެ ކުރިން ވެސް މޫސުން ގޯވުމުގެ ސަބަބުން ގިނަ މެޗުތަކެއްގައި ކުޅުން ފެށުން ލަސްކުރަންޖެހި ނުވަތަ މެޗުގެ ތެރެއިން ކުޅުން މެދުކަނޑާލާފައިވެއެވެ. އަދި ބައެއް މެޗުތައް ގަދަ ހޫނުގައި ކުޅެންޖެހުމުން ވެސް ޓީމުތަކުން ވަނީ އެކަމުގެ ޝަކުވާކޮށްފައެވެ.