އަށް މަހުގެ ކުއްޖަކު ނިޔާވުން؛ ތުހުމަތުތަކާއި ގުޅިގެން ހެލްތުން ވެސް މައްސަލަ ބަލަނީ
ސަރުކާރުގެ މައި ހޮސްޕިޓަލް -- އައިޖީއެމްއެޗް ގައި އުމުރުން 8 މަހުގެ ކުއްޖަކު ނިޔާވުމުގައި އެ ހޮސްޕިޓަލްގެ އިހުމާލު އޮތް ކަމަށް ތުހުމަތުވާތީ އެކަން ހެލްތް މިނިސްޓްރީން ވެސް ބަލަން ފަށައިފި އެވެ.
ކުއްޖާ ނިޔާވުމާއި ގުޅިގެން އާއިލާ އިން ވަނީ ސީރިއަސް މައްސަލަތަކެއް ފެންމަތި ކޮށްފަ އެވެ. އެ މައްސަލަ މިހާރު ދަނީ ހޮސްޕިޓަލުން ވެސް ބަލަމުންނެވެ. ހެލްތް މިނިސްޓްރީން ވެސް ބުނީ އެ މައްސަލަ ބަލަމުންދާ ކަމަށެވެ.
މީގެ ހަފްތާއެއްހާ ކުރިން ހިނގި މި ހާދިސާއާއި ގުޅޭ ގޮތުން ކުއްޖާގެ އާއިލާގެ ފަރާތުން މީސްމީޑިއާގައި ކުރި ޕޯސްޓެއްގައި ވަނީ އައިޖީއެމްއެޗަށް ބޮޑެތި ތުހުމަތު ތަކެއް ކޮށްފައެވެ.
އެގޮތުން، ސިއްޙަތު އެންމެ ރަނގަޅަށް ހުރި ތުއްތު ދަރިފުޅު ހޮޑުލައި، އަބަދުހެން ރޮވޭ ގޮތްވެ، ނުކެވޭތީ ކުއްޖާ ހޮސްޕިޓަލަށް ދެއްކުމުން އެންމެ ފުރަތަމަ ދެފަހަރުވެސް ބޭސް ދީފައި ގެއަށް ފޮނުވާލީ ކަމަށާ، ނަމަވެސް ހާލު ރަނގަޅު ނުވާތީ ތިންވަނަ ފަހަރަށް، މިމަހު 20 ވަނަ ދުވަހު ހޮސްޕިޓަލަށް ދެއްކުމުން އެޑްމިޓްކޮށް އައިވީ ގުޅީ ކަމަށް އާއިލާއިން ބުނެފައިވެއެވެ.
އަދި އެފަހުން ކުއްޖާގެ ލޭ ނަގައި ޓެސްޓުތައްވެސް ހެދި ނަމަވެސް އޭގެ ނަތީޖާ އާއިލާއާ ހިއްސާ ނުކުރާ ކަމަށް ބުނެފައިވެއެވެ.
އައިވީ ގުޅާފައި އޮތް އިރުވެސް އެ ކުއްޖާ ގަވާއިދުން ބުއްފުޅި ބޯ ކަމަށާ، ނަމަވެސް ހާލަތު އިތުރަށް ގޯސްވެ އެޑްމިޓް ކުރިތާ ދެވަނަ ދުވަހު ކުއްޖާ ދުޅަވެ، ފުފެން ފެށި ކަމަށް އާއިލާއިން ބުންޏެވެ.
"އެޑްމިޓް ކުރިތާ ދެދުވަސް ވީއިރު ކުއްޖާގެ މުޅި ހަށިގަނޑު އޮތީ ‘ބްލޯޓް’ ވެފައި. ހޮސްޕިޓަލުގެ މެޑިކަލް އޮފިސަރުން ސާމްޕަލްތައް ނަގުވައި، ޓެސްޓުތައް ހަދާފައި ބުނަނީ އިންފެކްޝަން އުފެދިގެންނޭ އެހެންވީ. އެކަމަކު ކޮންތާކު؟ކިހިނެއް؟ ނުވަތަ ކީއްވެ ވީ ކަމެއް ކަމެއް ނުބުނޭ. ހަމައެކަނި އިންފެކްޝަން އެކޭ ބުނެ އަޅާނުލާ,"
ތިންވަނަ އަށްވީ ދުވަހު، ކުއްޖާގެ ދުޅަ މައިތިރިވި ކަމަށާ ނަމަވެސް، އޭރުވެސް ބަނޑު ހުރީ ފުފިފައެވެ. އެހެންކަމުން، ޓެސްޓުތަކުގެ ނަތީޖާ ހިއްސާ ކުރުމަށް އާއިލާއިން ހޮސްޕިޓަލުގައި އާދޭސް ކުރުމުން ދިން ޖަވާބަކީ، ކުއްޖާ ދުޅަވީ ހަށިގަނޑުގައި ފުލުއިޑް ގިނަވެގެން ކަމަށާ، އަދި ލިވާގައި ހުންނަންޖެހޭ އެންޒައިމެއްވެސް ހުންނަންޖެހޭ ވަރަށްވުރެ މަތިވުމުން ކަމަށް ހޮސްޕިޓަލުން ބުނި ކަމަށް ޢާއިލާގެ ފަރާތުން ބުނެފައިވެއެވެ. ނަމަވެސް އެއީ ކޮން އެންޒައިމް އެއް ކަމާއި، އޭގެ ބޭނުމާއި އެފަދަ އެއްވެސް މައުލޫމާތެއް ހިއްސާ ނުކުރާކަން އާއިލާއިން ފާހަގަކޮށްފައިވެއެވެ.
"ހަތަރުވަނަ ދުވަހު ކުއްޖާއަށް ލޯވެސް ހުޅުވައި ނުލެވޭ. ނުހުޅުވައި އޮވެގެން ރޮނީ. ފަސް ވަނަ ދުވަހު ހާލަތު އިތުރަށް ގޯސްވުމުން، އާއިލާއިން ކަންބޮޑުވެ، ނަރުހުންނަށް ‘ހަޅޭލަވަން’ ފެށުމުން ޑރ. ފައިސަލް އައީ ކުއްޖާ ބަލަން,"
އާއިލާއިން ބުނެފައިވާގޮތުން، އޭގެ ކުރިން ކުއއޖާގެ ހާލަތު ބަލަން އައިސްފައިވަނީ މެޑިކަލް އޮފިސަރުންނެވެ. ކުޑަކުދިންގެ ޚާއްސަ ޑޮކްޓަރެއް ގެނެސްދިނުމަށް އެދުމުންވެސް އޭރު އެކަމެއް ނުކޮށް ދިނެވެ.
އެހާލަތުގައި، ކުއްޖާ ގޮވައިގެން ބޭރަށް ފުރަން، އާސަންދަ ހަމަޖައްސައި އެންސްޕާގެ އެހީ ހޯދަން މަސައްކަތް ފެށިއިރު، އެހީ ލިބުނުކަން އަންގައި އެންސްޕާއިން ގުޅިއިރު ކުއްޖާ ނިޔާވެފައިވާ ކަމަށް އާއިލާ ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
