އައިޖީއެމްއެޗުގައި ފަރުވާދެމުންދަނިކޮށް އަށް މަހުގެ ތުއްތު ކުއްޖާ ނިޔާވުމުގެ ކުރީން، އެ ކުއްޖާގެ ޙާލަތަށް ބަލައި ދެވެން ހުރި ހުރިހާ ފަރުވާ ދީފައިވާ ކަމަށް އެ ހޮސްޕިޓަލުން ބުނެފި އެވެ.
އައިޖީއެމްއެޗުގައި ފަރުވާ ދެމުންދަނިކޮށް ނިޔާވި އަށް މަހުގެ ޔޫނުސް ހުސެއިން އަބްދުالله ނިޔާވީ ހޮސްޕިޓަލުގެ އިހުމާލުން ކަމަށް ބުނެ ޢާއިލާ އިން ވަނީ އައިޖީއެމްއެޗަށް ބޮޑެތި ތުހުމަތު ތަކެއް ކޮށްފައެވެ.
އެކަމާއި ގުޅިގެން އެ ހޮސްޕިޓަލުން ރޭ ނެރުނު ބަޔާނުގައި ބުނީ ސިއްހީ ފަރުވާއާ ގުޅޭ ގޮތުން ހޮސްޕިޓަލަށް ހުށަހެޅޭ ކޮންމެ ޝަކުވާއަކީ އަދި ބަލި މީހުންގެ ފަރާތުން ކަންބޮޑުވުމެއް އޮތްކަން އެނގޭ ކޮންމެ ޝަކުވާ އަކީވެސް ސީރިއަސް ކަމެއްގެ ގޮތުގައި ބަލާ ކަމަށެވެ.
އެގޮތުން 8 މަހުގެ ކުއްޖާ ނިޔާވި މައްސަލައާ ގުޅިގެން އެ ހޮސްޕިޓަލުން މިހާތަނަށް ބެލިބެލުމުން އެނގޭ ގޮތުގައި ނިޔާވި ކުއްޖާގެ ބަލީގެ ހާލަތު ހުރި ގޮތުން ކުޑަކުދިންގެ ޑޮކްޓަރުންގެ ޓީމުން ގާތުން މޮނިޓާކޮށް، އެވަގުތު ދެވެން އޮތް ފަރުވާދީ، ގުޅުން ހުރި ލެ އާއި އެހެނިހެން ތަހުލީލުތައްކޮށް ފަރުވާއަށް ގެންނަން ޖެހޭ ބަދަލުތައް ދިޔައީ ގެންނަމުން ކަމަށެވެ.
"ރެކޯޑުތަކުން ދައްކާ ގޮތުން އެ ޑިޕާޓްމަންޓްގެ މެޑިކަލް އޮފިސަރުންގެ އިތުރުން ކުޑަކުދިންގެ ހާއްސަ ޑޮކްޓަރުން ވޯޑުތަކަށް ޒިޔާރާތްކޮށް ހަމަޖެހިފައިވާ އުސޫލުން ކޮންމެ ދުވަހަކުވެސް ކުއްޖާ ބަލާފައިވޭ،" ބަޔާނުގައި ބުންޏެވެ.
އައިޖީއެމްއެޗުން އިތުރަށް ބުނީ ބަލިމީހާއަށް އައިސީޔޫގައި ފަރުވާދެން ޖެހޭ ކަމަށް ޑޮކްޓަރުން ލަފާދޭނަމަ، އެކަން ހަމަޖެއްސުމަށް ޑޮކްޓަރުންގެ ޓީމުން މަސައްކަތްކުރާ ކަމަށާ، އެ ހޮސްޕިޓަލުގެ އައިސީޔޫ ފުރިފައިވާ ނަމަ، އެހެން ހޮސްޕިޓަލެއްގެ އައިސީޔޫއަށް ޓްރާންސްފާކުރުމުގެ އިންތިޒާމު ވެސް ހަމަޖައްސާ ކަމަށެވެ.
”ތުއްތު ކުއްޖަކަށް ނުވަތަ ބޮޑު މީހަކަށް ޖެހޭ ހުމެއް ނުވަތަ އިންފެކްޝަނަކާ ގުޅިގެން ދިމާވާ އިތުރު ނުރައްކާތެރި ބައެއް ކަންކަމަކީ ފުރާނައަށް ވެސް ގެއްލުން ވެދާނެ ފަދަ ސިއްހީ ފަރުވާގައި ދުރާލާ ދެނެގަންނަން އުނދަގޫ ކަންކަމެވެ. އަދި މިފަދަ ބައެއް ހާލަތްތަކުގައި ކުއްލިއަކަށް ހާލަތު ނުރައްކާ ވެދާނެ ފަހަރުވެސް ދިމާވާނެއެވެ.“ އައިޖީއެމްއެޗުން ބުނެފައިވެއެވެ.
ހާކު ސީރިއަސްވާ އެފަދަ ކޮންމެ މައްސަލައެއްގައި ވެސް ހޮސްޕިޓަލުގެ އެތެރޭގެ ތަހުގީގެއް ކުރާ ކަމަށާއި ހިދުމަތް ރަނގަޅުކުރުމަށް ކުރެވިދާނެ ކަންކަން ބަލާ ކަމަށް އައިޖީއެމްއެޗުން ބުންޏެވެެ.
"މި މައްސަލަ ވެސް މި ހޮސްޕިޓަލުން މިގެންދަނީ އިތުރަށް ބަލަމުންނެވެ. އަދި މައްސަލައެއް ބެލުމުގައި ހޮސްޕިޓަލުގައި ބަލި މީހުންނާއި އާއިލާގެ ފަރާތުން ކުރާ ތަޖުރިބާ ރަނގަޅުކުރުމަށް ކުރެވިދާނެ ކަންކަން ދެނެގަނެވި އެ ކަންކަން އިސްލާހު ކުރާ ކަމުގެ ޔަގީންކަން ވެސް މި ފުރުސަތުގައި އަރުވަމެވެ." ހޮސްޕިޓަލުގެ ބަޔާނުގައިވެ އެވެ.
Advertisement
This content is created and paid for by advertisers and does not involve Voice Journalists
