ތެލަސީމިޔާ ކޮންޓްރޯލް ކުރުމާބެހޭ ގާނޫނަށް ސަރުކާރުގެ ފަރާތުން ހުށަހެޅި އިސްލާހުތަށް ދިރާސާކުރުމަށްޓަކައި، ރައްޔިތުންގެ މަޖިލީހުގެ އިޖުތިމާއީ ކޮމިޓީއަށް މިއަދު ފޮނުވައިފިއެވެ.

ސަރުކާރުގެ ފަރާތުން އިހަވަންދޫ ދާއިރާގެ މެމްބަރު އަޙުމަދު ނަޞީރު ހުށަހެޅުއްވި މި ބިލު މަޖިލީހަށް ބަލައިގަނެފައިވަނީ 49 މެންބަރުންގެ އިއްތިފާގުންނެވެ.

ތެލަސީމިޔާ ކޮންޓްރޯލް ކުރުމާބެހޭ ގާނޫނަށް ސަރުކާރުގެ ފަރާތުން ހުށަހެޅި އިސްލާހުތަކުގެ ތެރޭގައި ހިމެނެނީ، ތެލަސީމިއާ ސެންޓަރުގެ ޑިރެކްޓަރ ޖެނެރަލްގެ މަޤާމުގެ ޝަރުތުތަށް މުރާޖައާކޮށް، ތެލަސީމިއާ ކުދިން ލިބުމުގެ ފުރުސަތު ބޮޑު މީހުން ކައިވެނިކުރުމުގެ އުސޫލުތައް ކަނޑައެޅުމަށް ނިންމަންޖެހޭ އިސްލާހުތަކެވެ.

މެމްބަރު ނަޞީރު ހުށަހަޅުއްވާފައިވާ މިބިލުގައިވާ ގޮތުން ތެލަސީމިއާ ސެންޓަރުގެ ޑިރެކްޓަރ ޖެނެރަލްގެ މަޤާމަކީ ސިވިލް ސަރވިސްގެ މަޤާމެކެވެ. އަދި މި މަޤާމަށް އައްޔަންކުރެވޭ ބޭފުޅަކު އައްޔަން ކުރެވޭނީ 5 އަހަރު ދުވަހުގެ މުއްދަތަކަށް ކަމަށާއި މި މަޤާމަށް އައްޔަން ކުރެވޭ ފަރާތަކީ މެނޭޖްމަންޓާއި ގުޅުންހުރި ދާއިރާއަކުން ޤައުމީ ސަނަދުގެ އޮނިގަނޑު ލެވެލް 8 ނުވަތަ 9ގެ ސަނަދެއް ހާސިލްކޮށްފައިވާ ފަރާތެއް ކަމަށްވާންޖެހޭނޭކަމަށެވެ.

ފާހަގަކޮށްލަންޖެހޭ ގޮތުގައި ތެލަސީމިޔާ ކޮންޓްރޯލް ކުރުމާބެހޭ ގާނޫނަށް އިސްލާހެއް ގެނެސް، ތެލަސީމިއާ ކުދިން ލިބުމުގެ ފުރުސަތު ބޮޑު މީހުން ކައިވެނިކުރުމާ ގުޅޭ މާއްދާއެއް ސަރުކާރުން މިވަނީ އިތުރުކޮށްފައެވެ. ޤާނޫނުގައި މިވަގުތު ކައިވެންޏާ ގުޅޭ މާއްދާއެއް ނެތް ނަމަވެސް، ތެލަސީމިއާއަށް ޓެސްޓުކުރުމުގައި ފަރުދުންގެ ޒިންމާއާ ގުޅޭ މާއްދާއެއް އޮނަނަކަން ފާހަގަކޮށްލަންޖެހެއެވެ.

އަލަށް އިތުރުކުރާ މާއްދާގައި ބަޔާންކޮށްފައިވާ ގޮތުގައި، ކައިވެނިކުރަން އެދޭ ދެ ފަރާތުންވެސް ކައިވެންޏަށް ހުއްދަ އެދި ރަޖިސްޓްރީއަށް ހުށަހަޅަންޖެހޭނީ ތެލަސީމިއާ ޓެސްޓް ހެދުމަށްފަހު އޭގެ ނަތީޖާއާއެކުގައެވެ. އެ ނަތީޖާއަށް ބަލައި ކައިވެނި ކުރާ 2 ފަރާތަކީ ވެސް ތެލަސީމިއާ ކެރިއަރުން ކަމުގައިވަނީ ނަމަ، އެފަދަ ކައިވެންޏެއް ކޮށްދެވޭނީ ޤާނޫނުގެ ދަށުން ހަދާ ޤަވާއިދެއްގައި ފުރިހަމަވާ ޕްރޮގްރާމެއް ފުރިހަމަ ކުރުމަށްފަހުގައި ކަމަށް އިސްލާހުގައި ބަޔާންކޮށްފައިވެއެވެ.

މި އިސްލާހުތަކުގެ ސަބަބުން ދިވެހިރާއްޖޭގައި ތެލަސީމިއާ ބަލި ކޮންޓްރޯލް ކުރުމަށް ބޮޑެތި ފަސޭހަތަކެއް ލިބިގެންދާނެކަން ފާހަގަކޮށްލަންޖެހެއެވެ.