މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ކުރިއަށްގެންދާ ށ. ނޫމަރާ ބަނދަރު ތަރައްގީކުރުމުގެ މަސައްކަތުގެ ބޮޑުބައި ނިންމާލައިފިއެވެ.

އެމްޓީސީސީން އެކްސްގައި ނޫމަރާ ބަނދަރުގެ މަސައްކަތް ކުރިއަށްދާ ގޮތާބެހޭގޮތުން އެކްސްގައި ކުރި ޕޯސްޓެއްގައި ބުނެފައިވަނީ، ހާބަރު ބޭސިން ފުން ކުރުމުގެ މަސައްކަތުގެ %86 ނިމިފައިވާ ކަމަށެވެ. މިވަގުތު ކުރިއަށްދަނީ ބަނދަރުގެ ޕޭވްމަންޓް ހެދުމުގެ މަސައްކަތްކަމަށެވެ.

މި މަޝްރޫއުގެ ދަށުން ކުރިއަށް ގެންދިއުމަށް ހަމަޖެހިފައިވާ މަސައްކަތްތަކުގެ ތެރޭގައި 34،386 ކިއުބިކް މީޓަރުގެ ސަރަހައްދެއް ކޮނެ ފުންކުރުމާއި، 5،076 ކިއުބިކް މީޓަރުގެ ސަރަހައްދެއްގައި ކުރިން ފުންކޮށްފައިވާ ފަޅު އަލުން ފުންކުރުމާއި, 2،920 ކިއުބިކް މީޓަރުގެ ސަރަހައްދެއްގައި ނެރު ފުންކުރުމުގެ އިތުރުން އެއްގަމު ތޮށި މަރާމާތު ކުރުން ހިމެނެއެވެ. މީގެ އިތުރުން 177 މީޓަރުގެ ސަރަހައްދެއްގައި އެއްގަމުތޮށިލުމާއި 303 މީޓަރުގެ ސަރަހައްދެއްގައި ބޭރުތޮށިލުމުގެ އިތުރުން 64 މީޓަރުގެ ސަރަހައްދެއްގައި ރިވެޓްމެންޓް ޖެހުންވެސް ހިމެނެއެވެ. ނޫމަރާ ބަނދަރު ހެދުމުގެ މަޝްރޫއުގެ ޖުމުލަ އަގަކީ 57.6 މިލިއަން ރުފިޔާއެވެ. 

ސަރުކާރުން މި މަޝްރޫއު އެމް.ޓީ.ސީ.ސީއާއި ހަވާލުކޮށްފައިވަނީ 2023 ވަނަ އަހަރުގެ ޖޫން މަހުގެ 22 ވަނަ ދުވަހުގައެވެ. ނޫމަރާ ބަނދަރު ތަރައްގީކުރަން އެކުންފުންޏާ ހަވާލުކޮށްފައިވަނީ 455 ދުވަހުގެ ތެރޭގައި މަސައްކަތް ނިންމާގޮތަށެވެ.