ފާއިތުވި 19 ދުވަސް ތެރޭގައި، މާލޭގައި ޕާކްކުރުން މަނާ ސަރަހަށްދުތަކުގައި ޕާކުކޮށްގެން 400 އަށްވުރެ ގިނަ އުޅަނދު ޓޯކޮށްފައިވާކަމަށް ފުލުހުން ބުނެފިއެވެ.
ފުލުހުން މިއަދުވަނީ، މާލޭގެ މަގުތަކުގެ ސަލާމަތާއި ރައްކާތެރިކަން ކަށަވަރުކޮށް، މަގުތައް ތަރުތީބު ކުރުމަށް ފުލުހުން ކުރަމުންދާ މަސައްކަތްތަކުގެ ތެރެއިން މަޖީދީމަގާއި ބޮޑުތަކުރުފާނުމަގުން ޓޯވ ކޮށްފައިވާ އުޅަނދުތަކުގެ ތަފާސްހިސާބު އިއުލާން ކޮށްފައެވެ.
އެ ތަފާސް ހިސާބުތަކުން އެނގޭ ގޮތުން، ނިމިދިޔަ ޖޫން މަހުގެ 12 ވަނަ ދުވަހުން ފެށިގެން 30 ވަނަ ދުވަހުގެ ނިޔަލަށް މާލޭގެ އެކި ސަރަހައްދު ތަކުން ގަވާއިދާ ޚިލާފަށް ޕާކުކޮށްފައިވާ 422 އުޅަނދު ވަނީ ޓޯވް ކޮށްފައެވެ.
އޭގެ ތެރޭގައި ހިމެނެނީ، މަޖީދީ މަގުން ޓޯވް ކުރެވުނު، 219 އުޅަނދާއި ބޮޑި ތަކުރުފާނުމަގުން ޓޯވް ކުރެވުނު 203 އުޅަނދެވެ.
މާލޭގެ މަގުތަކުގައި ދަތުރުފަތުރު ކުރުމަށާއި ހިނގާބިނގާވެ އުޅޭ މީހުންނަށް ފަސޭހަވާނެ ގޮތަށް މަގުތައް ތަރުތީބު ކުރުމަށް ފުލުހުން ކުރަމުން ގެންދާ މަސައްކަތްތަކުގެ ތެރެއިން ބައެއް މަގުތަކުގައި އާންމު ދަތުރުފަތުރާއި ޕަބްލިކް ޓްރާސްޕޯޓަށް ދަތިވާ ގޮތަށް ގަވާއިދާ ހިލާފަށް ޕާކުކޮށްފައި ހުންނަ ވެހިކަލްތައް ޓޯ ކުރުމުގެ މަސައްކަތް ގެންދަނީ ކުރަމުންނެވެ.
ފުލުހުން މީހެ ކުރިން ބުނެފައިވާ ގޮތުން، އެގޮތަށް ޕާކުކޮށްފައި ހުންނަ ވެހިކަލްތައް ދުއްވި މީހުންނާއިމެދު ވެސް ފިޔަވަޅު އަޅާނެ އެވެ. އަދި އެ ގޮތަށް ޓޯ ކުރެވޭ އުޅަނދުތައް ދޫކުރެވޭނީ 48 ގަޑިއިރު ފަހުން ކަމަށް ވެސް ބުންޏެވެ.
Advertisement
This content is created and paid for by advertisers and does not involve Voice Journalists
