ހުޅުމާލޭ ފޭސް އެކެއްގައި ހުންނަ ރަށު މާރުކޭޓުގައި ގަވާއިދާ ހިލާފަށް މަސައްކަތްކުރަމުންދިޔަ 15 ބިދޭސީއަކު އިމިގްރޭޝަނުގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން މިކަން ހާމަކޮށް އެކްސްގައި ކޮށްފައިވާ ޕޯސްޓެއްގައި ބުނެފައިވަނީ، އިއްޔެ ހަވީރު ހުޅުމާލޭގައި ކުރިއަށް ގެންދިޔަ ރެއިޑު އޮޕަރޭޝަނެއްގައި އިމިގްރޭޝަނުން 37 މީހަކު ޗެކުކޮށްފައިވާކަމަށެވެ.
އެމީހުންގެ ތެރެއިން ގަވައިދާ ޚިލާފަށް އެމާރުކޭޓުގައި ވިޔަފާރިކޮށް، މަސައްކަތް ކުރަމުންދިޔަ 15 ބިދޭސީއަކު ހިފަހައްޓާފައިވާ ކަމަށާއި މީގެ ތެރޭގައި ހިމެނެނީ 10 ފިރިހެނުންނާއި 05 އަންހެނުން ކަމަށް އިމިގްރޭޝަނުން ވަނީ ބުނެފައެވެ.
ގަވާއިދާ ހިލާފަށް ރާއްޖޭގައި ދިރިއުޅޭ ބިދޭސީންގެ މައްސަލައަށް ދާއިމީ ހައްލެއް ގެނައުމަށް ކުރަމުންއަންނަ މަސައްކަތްތަކުގެ ދަށުން އިމިގްރޭޝަނުން ދަނީ ގަވާއިދާ ޚިލާފަށް ރާއްޖޭގައި ދިރިއުޅޭ ބިދޭސީން ހޯދައި ޤާނޫނީ އިމުގެ ތެރެއަށް އެ މީހުން ވެއްދުމުގެ މަސައްކަތް ކުރަމުންނެވެ.
އަދި ސައްހަ ވިސާނެތި ރާއްޖޭގައި ވިޔަފާރިތައް ހިންގުމުގައި އުޅޭ ބިދޭސީން ދެނެގަތުމަށްޓަކައި ހާއްސަ އޮޕަރޭޝަންތަކެއް އިމިގްރޭޝަނުން ކުރިއަށްގެންދަމުންދާ ކަން ފާހަގަކޮށްލަންޖެހެއެވެ.
ގަވާއިދާ ހިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމުގެ ގޮތުން ސަރުކާރުން ވަނީ ރާއްޖޭގައި އުޅެމުންދާ ބިދޭސީންގެ އަދަދާއި އެ މީހުންގެ މައުލޫމާތު އެއްކުރުމުގެ ގޮތުން އެ މީހުންގެ ބަޔޯމެޓްރިކް ޑޭޓާ ނެގުންފަދަ މުހިއްމު މަސައްކަތްތަކެއް ކުރަން ފަށާފައެވެ.
ގަވާއިދާ ހިލާފަށް ރާއްޖޭގައި އުޅެމުންދާ ބިދޭސީންގެ މައްސަލައަށް ދާއިމީ ހައްލެއް ގެނައުމުގެ ގޮތުން މިހާތަނަށް 7،000 އަށް ވުރެ ގިނަ މީހުން މިހާތަނަށް ޑީޕޯޓްކޮށްލެވިފައިވާ ކަމަށް އިމިގްރޭޝަނުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
