ވެލާނާ އިންޓަރނޭޝަނަލް އެއާޕޯތްގެ އައު ޓާމިނަލުގައި ބޭނުންކުރާ ބޯޑިން ބްރިޖްތައް އޮޕަރޭޓްކުރާނޭ މުއައްޒަފުން ތަމްރީނުކޮށް ނިންމާލައިފިއެވެ.

ވީއައިއޭ ހިންގާ އެމްއޭސީއެލުން ބުނީ ފަސިންޖަރު ބޯޑިން ބްރިޖުތައް އޮޕަރޭޓް ކުރަން މިހާތަނަށް 46 މުވައްޒަފުން ތަމްރީންކޮށްފައިވާކަމަށެވެ. އޭގެ ތެރެއިން 14 މުވައްޒަފުން ތަމްރީން ކޮށްފައިވަނީ މެލޭޝިއާއަށް ފޮނުވައިގެންނެވެ. 

މި ތަމްރީނުތަކުގެ ބޭނުމަކީ ފަސިންޖަރު ބޯޑިން ބްރިޖުތައް އޮޕަރޭޓް ކުރާ މުވައްޒަފުން އިންޑަސްޓްރީގެ މިންގަނޑުތަކާއި ބެސްޓް ޕްރެކްޓިސްތަކަށް އަހުލުވެރިކުރުންކަމަށް އެމްއޭސީއެލުން ބުނެއެވެ. އަދި ބޯޑިން ބްރިޖުތައް ސަލާމަތްތެރިކަމާއެކު އޮޕަރޭޓް ކުރުމަށް ބޭނުންވާ ހުނަރުތައް ދަސްކޮށްދިނުމެވެ.

ފަސިންޖަރު ބޯޑިން ބްރިޖަކީ ރައްކާތެރި ކަމާއެކު މަތިންދާބޯޓުން ޓާމިނަލްއަށް ފޭބުމަށް ގުޅާލެވޭ ބްރިޖެކެވެ. މި ބްރިޖުގެ ސަބަބުން ޓާމިނަލުން މަތިންދާބޯޓަށް އަދި މަތިންދާބޯޓުން ޓާމިނަލަށް ދިއުމަށް ބަސް ބޭނުންނުކޮށް މަތިންދާބޯޓުން ސީދާ ޓާމިނަލަށް ފޭބޭނެ އެވެ. މިއީ އާ ޓާމިނަލްއާއެކު ރާއްޖޭގައި އަލަށް ބޭނުންކުރަން ފަށާ ހިދުމަތެއްކަމަށް އެމްއޭސީއެލުން ފާހަގަކުރެއެވެ.

ވީއައިއޭގެ އައު ޓާމިނަލް ހުޅުވުމަށް ނިންމާފައިވަނީ ރާއްޖޭގެ މިނިވަންދުވަހާ ދިމާކޮށް ޖުލައިމަހުގެ 26 ވަނަ ދުވަހުއެވެ. އައު ޓާމިނަލް ހުޅުވުމުގެ ގޮތުން އެމްއޭސީއެލުން މިހާރުވެސް ވަނީ ޓާމިނަލް ހުޅުވުމުގެ ގޮތުން ކުރަންޖެހޭ ގިނަ ކަންކަން ފުރިހަމަކޮށްފައެވެ.