އެމެރިކާގައި މިހާރު ކުރިއަށްދާ ކުލަބު ވޯލްޑްކަޕް ފުޓްބޯޅަ މުބާރާތުގެ ގުރޫޕް ސްޓޭޖުގައި ޔޫރަޕްގެ ޗެމްޕިއަން ޕީއެސްޖީ ބަލިކުރި ބްރެޒިލްގެ ޗެންޕިއަން ބޮޓަފޯގޯގެ ކޯޗަކަށް ބްރެޒިލްގެ ޤައުމީ ޓީމުގެ ކޯޗު ކާލޯ އެންޗެލޯޓީގެ ދަރި ޑޭވިޑް އެންޗެލޮޓީ ހަމަޖައްސައިފިއެވެ.
އެންމެ ފަހުގެ ކޯޕާ ލިބަޓަޑޯރެސް އަދި ބްރެޒިލިއަން ސެރީ އޭގެ ޗެމްޕިއަންސް ބޮޓަފޮގޯ ކުލަބް ވޯލްޑްކަޕްގެ ދެވަނަ ބުރުގައި ވާދަވެރި ޕަލްމެއިރަސް އަތުން ބަލިވެ މުބާރާތުން ކެޓުމާއެކު އެޓީމުން ވަނީ ކޯޗު ރެނާޓޯ ޕައިވާ މަޤާމުން ވަކިކޮށްފައެވެ.
މީގެ ކުރިން ކޯޗިންގެ ކެރިއަރުގައި ޑޭވިޑް އެންޗެލޮޓީ އެއްވެސް ކުލަބެއްގެ ހެޑްކޯޗެއްގެ ގޮތުގައި މަސަކަތްކޮށްފައި ނުވި ނަމަވެސް އެސިސްޓެންޓް ކޯޗެއްގެ ގޮތުގައި ބައްޕަ ކާލޯ އެންޗެލޮޓީ އާއެކު އޭނާ ވަނީ ރެއާލް މެޑްރިޑާއެކު ގިނަ ކާމިޔާބިތަކެއް ހޯދާފައެވެ.
އުމުރުން 35 އަހަރުގެ ޑޭވިޑް އެންޗެލޮޓީގެ ކޯޗިން ކެރިއަރު ފަށާފައި ވަނީ 2018 ވަނަ އަހަރު ނަޕޯލީ އިންނެވެ. އަދި 2019 ވަނަ އަހަރު އެވަޓަންގައި މަސައްކަތް ކުރުމަށްފަހު 2021 ވަނަ އަހަރުން ފެށިގެން މިސީޒަނުގެ ނިޔަލަށް އޭނާ މަސައްކަތްކުރީ ރެއާލް މެޑްރިޑްގެ އެސިސްޓެންޓް ކޯޗެއްގެ ގޮތުގައެވެ. އަދި ޑޭވިޑް އެންމެ ފަހުން މަސައްކަތްކުރީ ބައްޕަ ކާލޯ އެންޗެލޮޓީއާއެކު ބްރެޒިލްގެ އެސިސްޓެންޓް ކޯޗެއްގެ ގޮތުގައެވެ
Advertisement
This content is created and paid for by advertisers and does not involve Voice Journalists
