ކްރޮއޭޝިއާގެ ތަޖްރިބާކާރު މިޑްފީލްޑަރު ލޫކާ މޮޑްރިޗް އިޓަލީގެ އޭސީ މިލާނަށް ސޮއިކޮށްފިއެވެ.

2012 ވަނަ އަހަރު ޕްރެމިއާ ލީގުގެ ޓޮޓެންހަމް އިން ރެއާލް މެޑްރިޑަށް ބަދަލުވި މޮޑްރިޗް ރެއާލް މެޑްރިޑް ދޫކޮށްލަން ނިންމީ އެކުލަބުގައި ކާމިޔާބު 13 އަހަރު ހޭދަކުރުމަށްފަހު އެވެ. އަދި ހިލޭ ޓްރާންސް އެއްގައި އޭނާ އޭސީ މިލާނާއެކު ސޮއިކުރީ އެއްއަހަރު ދުވަހުގެ އެއްބަސްވުމެއްގައެވެ. 

މީގެ އިތުރުން ދެފަރާތުން އެއްބަސްވާނަ މި އެއްބަސްވުން 2027 ވަނަ އަހަރުގެ ޖޫން މަހާގެ ނިޔަލަށް އިތުރެވޭފަދަ މާއްދާއެއް މި އެއްބަސްވުމުގައި ހިމަނާފައިވެއެވެ. އަދި މިލާނުގައި މޮޑްރިޗް ބޭނުންކުރާނީ ނަންބަރު 14 ޖާޒީގައެވެ.

އުމުރުން 39 އަހަރުގެ މިޑްފީލްޑަރު މިސީޒަން ނިމުމާއެކު ރެއާލް މެޑްރިޑް ދޫކޮށްލާނެކަން މިއަހަރުގެ މޭ މަހު އިއުލާންކޮއްފައިވާއިރު، ނިމިދިޔަ ޖޫންމަހުގެ ނިޔަލަށް ރެއާލް މެޑްރިޑާއެކު މޮޑްރިޗް ހަދާފައިވާ އެއްބަސްވުމުގެ މުއްދަތު ހަމަވަމުން، އެކުލަބުން ވަނީ ނިމިދިޔަ ކުލަބު ވޯލްޑްކަޕް ފުޓްބޯޅަ މުބާރާތުގެ ނިޔަލަށް މޮޑްރިޗް އާއެކު އިތުރު އެއްބަސްވުމެއްގައި ސޮއިކޮށްފައެވެ.

އެގޮތުން ކުލަބު ވޯލްޑްކަޕްގެ ސެމީފައިނަލުގައި ޕީއެސްޖީ އަތުން ބަލިވެ ރެއާލް ކެޓުމާއެކު ރެއާލް އާއެކު މޮޑްރިޗް ފަހުން ހެދި އެއްބަސްވުން ވަނީ ނިމުމަކަށް އައިސްފައެވެ.

ރެއާލް މެޑްރިޑްގައި މޮޑްރިޗް ހޭދަކުރި 13 އަހަރުތެރޭގައި އޭނާ ވަނީ އެޓީމަށް 597 މެޗު ކުޅެ، އެޓީމާއެކު 28 މުބާރާތެއް ކާމިޔާބުކޮށްފައެވެ. އޭގެ ތެރޭގައި ލީގު ޗެންޕިއަންކަން ހަތަރު ފަހަރު، ކުލަބު ވޯލްޑްކަޕް ފަސް ފަހަރު، ޔުއެފާ ސުޕަކަޕް ފަސް ފަހަރު، ޔުއެފާ ޗެންޕިއަންސް ލީގު ހަ ފަހަރު، ސްޕެނިޝް ސުޕަކަޕް ފަސް ފަހަރު، ކޮޕާ ޑެލަރޭ ދެފަހަރު އަދި އިންޓަކޮންޓިނަންޓަލް ކަޕް އެއްފަހަރު ކާމިޔާބުކުރުން ހިމެނެ އެވެ. 

މީގެ އިތުރުން 2018 ވަނަ އަހަރުގެ ފީފާ ދަ ބެސްޓް އެވޯޑާއި ބެލެންޑޯ އެވޯޑްގެ އިތުރުން އެއަހަރު ބޭއްވުނު ވޯލްޑްކަޕް ފުޓްބޯޅަ މުބާރާތުގެ މޮޅު ކުޅުންތެރިޔާގެ އެވޯޑް ހާސިލްކުރީވެސް މޮޑްރިޗް އެވެ.