އިނގިރޭސި ޕްރެމިއާ ލީގުގެ މެންޗެސްޓާ ސިޓީ އިން ޖަރުމަނުގެ މަޝްހޫރު ކުޅިވަރު ސާމާނު އުފައްދާ ކުންފުނި ޕުމާއެކު 1.3 ބިލިއަން ޑޮލަރުގެ އެއްބަސްވުމުގައި ސޮއިކޮށްފިއެވެ.
10 އަހަރު ދުވަހުގެ މިއެއްބަސްވުމުގެ ދަށުން ޕޫމާ އިން އަހަރަކަށް 100 މިލިއަން ޑޮލަރު މެންޗެސްޓާ ސިޓީއަށް ދިނުމަށް އެއްބަސްވެފައިވާއިރު، މިއީ އިނގިރޭސި ފުޓްބޯޅައިގެ ރެކޯޑެކެވެ. އަދި ކުރިން މިރެކޯޑް އޮތީ ވާދަވެރި މެންޗެސްޓާ ޔުނައިޓެޑްގެ އަތުގައެވެ. އެއީ 2023 ވަނަ އަހަރު އެޑިޑާސްއާކު އެކުލަބުން ހެދި 900 މިލިއަން ޑޮލަރުގެ އެއްބަސްވުމާއެކުގައެވެ.
ސިޓީން 2019 ގައި ޕޫމާއާ އެކު ހެދި އެއްބަސްވުމުން އެ ކްލަބަށް ލިބުނީ އަހަރަކަށް 65 މިލިއަން ޑޮލަރެވެ. އަދި ސިޓީ ފުޓްބޯޅަ ގުރޫޕްގެ ސިއީއޯ ފެރާން ސޮރިއާނޯ ބުނީ ޕޫމާއާ އެކު އެކުލަބުން އެއްބަސްވުން އައު ކުރީ އެހެން ބަޔަކާ ޗެލެންޖެއް ކުރުމުގެ މަގްސަދުގައި ނޫން ކަމަށެވެ.
"ސިޓީ ގުރޫޕްގެ އަމިއްލަ ޗެލެންޖެއް. އަހަރެމެން މި ބަލަނީ އަހަރެމެން އަމިއްލަ އަށް ކަނޑައަޅާފައިވާ ޓާގެޓްތަކަށް ވުރެ މައްޗަށް ދެވޭތޯ،" ސޮރިއާނޯ ބުންޏެވެ.
ސިޓީ ގުރޫޕުން ހިންގާ ބައެއް އެހެން ކްލަބްތަކަށް ވެސް ޕޫމާއިން ޖޯޒީ އާއި ކިޓް ފޯރުކޮށްދެ އެވެ. އެއީ ޖިރޯނާ، ޕަލޭމޯ، މެލްބަން ސިޓީ އަދި މުމްބާއީ ސިޓީ އެވެ.
Advertisement
This content is created and paid for by advertisers and does not involve Voice Journalists
