ސެންޓްރަލް އޭޝިއާ ވޮލީބޯލް އެސޯސިއޭޝަން (ކާވާ) ޗެންޕިއަންސް ލީގު މާދަމާ، މާލޭ ސިޓީގައި ފަށާއި މިމުބާރާތުގައި ރާއްޖޭގެ ދެޓީމެއް ވާދަކުރާނެއެވެ.
މިމަހުގެ 17 އިން ފެށިގެން 23 އާއި ދެމެދު ކުރިޔަށްދާ މިމުބާރާތް މާލޭ ސޯސަލް ސެންޓަރުގައި ކުރިޔަށްގެންދަން ހަމަޖެހިފައިވާއިރު، މިމުބާރާތުގައި ރާއްޖެ ތަމްސީލުކުރަނީ ހައުސިން ޑިވޮލަޕްމަންޓް ކޯޕަރޭޝަން (އެޗްޑީސީ) އާއި ދިވެހި ސިފައިންގެ ކުލަބު (ޑީއެސްސީ) އެވެ.
މިމުބާރާތުގައި ވާދަކުރާ ދިވެހި ދެޓީމަކީ ނިމިދިޔަ ރާއްޖޭގެ ވޮލީބޯޅަ ސީޒަނުގެ އެންމެ ކާމިޔާބު ދެޓީމެވެ. އެގޮތުން މިއަހަރުގެ ޤައުމީ ލީގާއި އެސޯސިއޭޝަން ޗެންޕިއަންޝިޕްގެ އިތުރުން ޤައުމީ މުބާރާތުގެ ޗެންޕިއަންކަން ދިވެހި ސިފައިންގެ ކުލަބު ޑީއެސްސީ އިން ކާމިޔާބުކުރިއިރު، އެޓީމާއި އެންމެ ގާތުން ވާދަކޮށްފައިވަނީ އެޗްޑީސީ އިންނެވެ.
މި މުބާރާތުގައި ރާއްޖޭގެ ދެ ޓީމުގެ އިތުރުން، ކިރްގިސްތާންގެ ބެޝިކް، ނޭޕާލުގެ ހެލްޕް ނޭޕާލް ސްޕޯޓްސް ކްލަބް، ޒަހީކް، އަދި ސްރީލަންކާ ޕޯޓް އޮތޯރިޓީ ވޮލީބޯލް ކްލަބާއެކު ޖުމްލަ ހަ ޓީމެއް ވާދަކުރާނެއެެވެ.
މީގެ އިތުރުން ސޯޝަލް ސެންޓަރު އިންޑޯ ހޯލުގައި ކުޅޭ މި މުބާރާތުގެ މެޗުތައް ބެލުމަށް ޓިކެޓް ވިއްކަން ވަނީ ނިންމާފައިވެއެވެ. އަދި ކޮންމެ މެޗަކަށް 20 ރުފިޔާގެ އަގުގައި ޓިކެޓް ވިއްކުމަށް ހަމަޖެހިފައިވާއިރު، ކޮންމެ މެޗެއް ފެށުމުގެ އެއް ގަޑިއިރު ކުރިން މެޗް ޓިކެޓް ވިއްކަން ފަށާނެއެވެ.
Advertisement
This content is created and paid for by advertisers and does not involve Voice Journalists
