ދަރިންނަށް ހަރަދުނުދޭ މީހުންގެ ވަނަވަރު އެންމެފަހުން ފެމިލީ ކޯޓުންވެސް އާއްމުކުރަން ފަށައިފިއެވެ.
ފެމިލީ ކޯޓުން މިއަދު ވަނީ ސާބިތު ހަރަދަށް ފައިސާ ނުދައްކާ ފަރާތްތަކުގެ ނަންތައް ހާމަކުރުމުގެ އުސޫލުގެ ދަށުން ދަރިންނަށް ހަރަދު ނުދޭ މީހެއްގެ ފުރިހަމަ ވަނަވަރު ފޮޓޯއާއެކު އާއްމުކޮށްފައެވެ. އެމީހަކީ މާލޭ ދަފްތަރުގައި ރަޖިސްޓްރީވެފައިވާ އަހުމަދު އަލީ ނަމަކަށް ކިޔާ މީހެކެވެ.
ސާބިތު ހަރަދަށް ފައިސާ ނުދައްކާ ފަރާތްތަކާމެދު ކޯޓުން އަޅާ ފިޔަވަޅެއްގެ ގޮތުން އެފަދަ މީހުންގެ ވަނަވަރު އާއްމުކުރުމުގެ ބާރު ގަވާއިދުގެ ތެރެއިން ކޯޓަށް އޮވެއެވެ.
ބައެއް މެޖިސްޓްރޭޓް ކޯޓުތަކުން އަންނަނީ މިއަހަރުގެ ޖެނުއަރީމަހުން ފެށިގެން ދަރިންނަށް ހަރަދުނުދޭ މީހުންގެ ނަންތައް އާއްމުކުރަމުންނެވެ.
ދެމަފިރިން ވަރިވުމަށްފަހު ބަފައިން ދަރިންނަށް ހަރަދުނުދޭ މައްސަލަތައް އިތުރުވަމުން އަންނަކަމަށް ފެމިލީ ކޯޓުގެ ތަފާސްހިސާބުތަކުން ދައްކައެވެ. މިގޮތުން މިފަދަ ބައެއް މައްސަލަތައް ކޯޓަށް ހުށަހަޅައި ކޯޓަށް ފައިސާ ދެއްކުމަށް ޝަރީއަތުގެ މަޖިލީހުން ނިންމި ނަމަވެސް އެކަމަށްވެސް އަމަލުނުކުރާ މީހުން އުޅެއެވެ. ކޯޓުތަކުން ދަނީ އޮންނަ އުސޫލުގެ ދަށުން އެފަދަ މީހުންގެ ވަނަވަރު އާއްމުކުރަމުންނެވެ.
Advertisement
This content is created and paid for by advertisers and does not involve Voice Journalists
