މާލޭގައި މިހާރު ކުރިއަށްދާ ކާވާ މެންސް ޗެންޕިއަންސް ލީގު 2025 ގައި މިއަދު މެންދުރު ކިރްގިސްތާނުގެ ބިޝްކެކް އާއި ކަޒަކިސްތާނުގެ ޒައިކް ވޮލީ ކުލަބް ވާދަކުރި މެޗު ފަސޭހަކަމާއެކު ސީދާ ތިން ސެޓުން މޮޅުވެ ލީގުބުރުގެ އެއްވަނަ ޓީމުގެ ގޮތުގައި ޒައިކް އިން ފައިނަލްގެ ޖާގައެއް ކަށަވަރުކޮށްފިއެވެ.

މުބާރާތުގައި ކިރްގިސްތާނުގެ ބިޝްކެކް ކުޅުނު ފުރަތަމަ މެޗުގައި ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ) ސީދާ ތިން ސެޓުން މޮޅުވިއިރު، ދެވަނަ މެޗުގައި ސްރީލަންކާ ޕޯޓްސް އޮތޯރެޓީ އަތުން އެޓީމު މޮޅުވީ 3-1 ގެ ނަތީޖާއަކުންނެވެ. އަދި ލީގުބުރުގެ ތިންވަނަ މެޗުގައި ހެލްޕް ނޭޕާލް ސްޕޯޓްސް ކުލަބު އަތުން 3-2 ގެ ނަތީޖާއަކުން މޮޅުވިއިރު، ހަތަރުވަނަ މެޗުގައި ދިވެހި ސިފައިންގެ ކުލަބު ޑީއެސްސީ އަތުން އެޓީމު މޮޅުވީ ސީދާ ތިން ސެޓުންނެވެ.

މީގެ އިތުރުން މުބާރާތުގައި ކަޒަކިސްތާނުގެ ޒައިކް ވޮލީ ކުލަބު ކުޅުނު ފުރަތަމަ މެޗުގައި ސްރީލަންކާ ޕޯޓްސް އޮތޯރެޓީ އަތުން 3-1 ގެ ނަތީޖާއަކުން މޮޅުވިއިރު، ޑީއެސްސީ އަދި އެޗްޑީސީ އާއި ދެކޮޅަށް ކުޅުނު ދެމެޗު ވެސް އެޓީމުން ކާމިޔާބުކުރީ ސީދާ ތިން ސެޓުންނެވެ. ނަމަވެސް އެޓީމު ކުޅުނު ހަތަރުވަނަ މެޗުގައި ހެލްޕް ނޭޕާލް ސްޕޯޓްސް ކުލަބު އަތުން 3-2 ގެ ނަތީޖާއަކުން ޒައިކް ވަނީ ބަލިވެފައެވެ.

މުޅި މެޗުގައި ވެސް މޮޅަށް ކުޅެ ރައިކް އިން މެޗު ޑޮމިނޭޓްކުރިއިރު، މެޗުގެ ސެޓްތައް އެޓީމުން ކާމިޔާބުކުރީ 18-25، 22-25 އަދި 16-25 ގެ ނަތީޖާއަކުންނެވެ.

މިނަތީޖާއެކު ލީގުބުރުގައި ކުޅުނު ފަސް މެޗުން ކަޒަކިސްތާނުގެ ޒައިކް ވޮލީ ކުލަބަށް 13 ޕޮއިންޓް ލިބިފައިވާއިރު، ލީގުބުރުގެ އެއްވަނަ ޓީމުގެ ގޮތޮތުގައި އެޓީމުން ވަނީ މުބާރާތުގެ ފައިނަލުން ޖާގައެއް ކަށަވަރުކޮށްފައެވެ. އަދި މިމެޗުން ބަލިވި ބިޝްކެކް ލީގުބުރުގައި ކުޅުނު ފަސް މެޗުން ލިބުނު 11 ޕޮއިންޓާއެކު މިވަގުތު އޮތީ ތާވަލުގެ ދެވަނައިގައެވެ.

17 ޖުލައި 2025 އިން 23 ޖުލައި 2025 ގެ ނިޔަލަށް ކުރިއަށްދާ މިމުބާރާތުގައި ޖުމްލަ ހަ ޓީމަކުން ވާދަކުރަމުން އަންނައިރު، އޭގެ ތެރޭގައި ހިމެނެނީ ރާއްޖޭގެ ޤައުމީ ޗެންޕިއަން ދިވެހި ސިފައިންގެ ކުލަބު (ޑީއެސްސީ) އަދި ރަނަރަޕްގެ ހައުސިންގ ޑިވޮލަޕްމަންޓް ކޯޕަރޭޝަން (އެޗްޑީސީ) ގެ އިތުރުން ސްރީލަންކާ ޕޯޓްސް އޮތޯރެޓީ، ނޭޕާލްގެ ހެލްޕް ނޭޕާލް ސްޕޯޓްސް ކުލަބު، ކިރްގިސްތާނުގެ ބިޝްކެކް އަދި ކަޒަކިސްތާނުގެ ޒައިކް ވޮލީ ކުލަބް އެވެ.