"ކާށިދޫ ކައުންސިލް ފުޓްބޯޅަ ޗެލެންޖް 2025" ފެއްޓުމުގެ ގޮތުން މިއަދު ހަވީރު ކާށިދޫ ފުޓްބޯޅަ ދަނޑުގައި ޚާއްސަ ރަސްމިއްޔާތެއް ބާއްވައިފިއެވެ.

މިރަސްމިއްޔާ ޝަރަފްވެރިކޮށްދެއްވީ ކާށިދޫ ލައުންސިލްގެ ރައީސް މުހައްމަދު އާމިރު އެވެ. އަދި މިރަސްމިއްޔާތުގައި ކާށިދޫ ކައުންސިލްގެ މެންބަރުންނާއި މުއްސަސާތަކުގެ އިސްވެރިންގެ އިތުރުން މުބާރާތުގައި ވާދަކުރާ ޓީމުތަކުގެ މެނޭޖަރުންނާއި ގިނަ އަދަދެއްގެ އާންމުން ވަނީ ބައިވެރިވެފައެވެ.

މިރަސްމިއްޔާތުގައި ވާހަކަފުޅުވދައްކަވަމުން ކާށިދޫ ކައުންސިލްގެ ރައީސް ވިދާޅުވީ ކޮންމެ ކަމެއްވެސް ކުރިއަރުވަން ބޭނުންނަމަ ވާދަވެރި ވާދަވެރި މާހައުލެއް ވަރަށް މުހިންމުކަމަށާއި، އެގޮތުން ކުޅިވަރު ކުރިއެރުވުމަށް ވާދަވެރި މުބާރާތްތަކެއް ދެމެހެއްޓެނިވި ގޮތެއްގައި ބާއްވަންޖެހޭކަމަށެވެ.

އިތުރަށް ވާހަކަފުޅުދައްކަވަމުން ކައުންސިލްގެ ރައީސް ވިދާޅުވީ މިމުބާރާތް އެންމެ ފުރަތަމަ ބޭއްވިއިރާއި މިހާރާއި އަޅާބަލާއިރު، ހުރިހާ ދިމާލަކުން ވެސް ބޮޑެތި ކުރިއެރުންތަކެއް އައިސްފައިވާކަމަށެވެ. އެގޮތުން މުބާރާތްގެ އިންތިޒާމުތަކަށާއި ކުޅުންތެރިންގެ ހުނަރާއި ޓީމުތަކުގެ ފެންވަރަށް ބެލި ނަމަވެސް ބޮޑެތި ކުރިއެރުންތަކެއް އައިސްފައިވާކަމަށެވެ.

މީގެ އިތުރުން މިމުބާރާތް ކާމިޔާބުކަމާއެކު ކުރިއަށް ގެންދިއުމަށް ރަށުގެ ޒުވާނުންނާއި ކުލަބު ޖަމްއިއްޔާތައް ގުޅިގެން ކުރަމުން އަންނަ މަސައްކަތް ފާހަގަކޮށް ކައުންސިލްގެ ރައީސް ވަނީ އެފަރާތްތަކަށް ޝުކުރުއަދާކޮށްފައެވެ.

މި ރަސްމިއްޔާތުގައި މުބާރާތުގެ އައު ޓްރޮފީ އިފްތިތާހުކުރުމުގެ އިތުރުން މުބާރާތް ފެއްޓުމުގެ ގޮތުން އެމްޖީ ސްޕޯޓްސް ކުލަބުގެ 12 އަހަރުން ދަށު ކުދިންގެ ފުޓްބޯޅަ މެޗެއް ވެސް ވަނީ ކުޅެފައެވެ.

24 ޖުލައި 2025 އިން 03 އޮގަސްޓް 2025 ގެ ނިޔަލަށް ކުރިއަށް ގެންދިއުމަށް ހަމަޖެހިފައިވާ މިމުބާރާތުގައި މިއަހަރު އަށް ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމެޖެހިފައިވަނީ ބައިވެރިވި އަށް ޓީމު ދެ ގުރޫޕަކަށް ބަހާލައިގެންނެވެ.

އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖައެއް ހޯދާ ދެޓީމު ސެމީ ފައިނަލަށް ހޮވޭއިރު، މުބާރާތުގެ ސެމީ ފައިނަލް ދެމެޗު ކުޅުމަށް ހަމަޖެހިފައިވަނީ ޖުލައި 31 އަދި އޮގަސްޓް އެއްވަނަ ދުވަހު އެވެ. އަދި ފައިނަލް މެޗު ކުޅުމަށް ހަމަޖެހިފައިވަނީ އޮގަސްޓް ތިންވަނަ ދުވަހު އެވެ.

މީގެ އިތުރުން މިއަހަރުގެ މުބާރާތުގެ ޗެންޕިއަން ޓީމަށް 40،000 އަދި ރަނަރަޕް ޓީމަށް 25،000 ރުފިޔާގެ ފައިސާގެ އިނާމެއް ކާށިދޫ ކައުންސިލްގެ ފަރާތުން ވަނީ ކަޑައަޅާފައެވެ.