ކްރިކެޓް ބޯޑް އޮފް މޯލްޑިވްސް (ސީބީއެމް)އިން އިންތިޒާމުކޮށްގެން ބޭއްވި 2025 މައިލޯ މޯލްޑިވްސް ޓީ20 ޕްރިމިއާ ލީގުގެ ފަހު މެޗުގައި ތިން ވިކެޓުން ސިބީއެލް ސްޕޯޓްސް ބަލިކޮށް މިލާން ކްރިކެޓް އެކެޑަމީ އިން މުބާރާތުގެ ޗެންޕިއަންކަން ހޯދައިފިއެވެ.

މެޗުގައި ގުރުދިމާވުމުން ސީބީއެލް ގަސްދުކުރީ ކުޅުމަށެވެ. ސީބީއެލް ކުޅެންއަރާ 20 އޯވަރު ހަމަވިއިރު ހަތަރު ކުޅުންތެރިން ނުބައިވެގެން ހެދުނީ 176 ލަނޑެވެ. އަދި އެޓީމުން އެންމެ ރަނގަޅަށް ކުޅުނީ 50 ބޯޅައިން 66 ލަނޑު ހެދި ޕިޔާލާ ކުމާރާ ވިޖޭސިންހައެވެ. މި އިނިންގްސްގަ މިލާންގެ އަހުމަދު އަމީލް ވަނީ ދެ ވިކެޓް ނަގާފައެވެ.

ޖަވާބުގައި މިލާން ކްރިކެޓް އެކަޑަމީ ޓީމު ކުޅެން ނުކުމެ 20ވަނަ އޯވަރުގައި ހަތް ކުޅުންތެރިން ނުބައިވެގެން 178 ލަނޑުހަދާ މެޗު ކާމިޔާބު ކުރިއެވެ. އަދި އެޓީމުން އެންމެ ރަނގަޅަށް ކުޅުނީ 54 ބޯޅައިން 62 ލަނޑު ހަދާ މެޗުގެ މޮޅު ކުޅުންތެރިޔާގެ މަގާމު ހޯދި ޔޫސުފް އަޒިޔާން ފަރުހަތެވެ.

މިނަތީޖާއެކު ލީގުގައި ކުޅުނު ފަސް މެޗުން ވެސް މޮޅުވެ 15 ޕޮއިންޓާއެކު މިލާން ކްރިކެޓް އެކަޑަމީ އިން ލީގު ޗެންޕިއަންކަން ކަށަވަރުކުރިއިރު، މިމެޗުން ބަލިވި ސިބީއެލް ސްޕޯޓްސް ލީގުގައި ކުޅުނު ފަސް މެޗުން ލިބުނު 12 ޕޮއިންޓާއެކު މުބާރާތް ނިންމާލީ ތާވަލުގެ ދެވަބައިގައެވެ.

2025 މައިލޯ މޯލްޑިވްސް ޓީ20 ޕްރިމިއާ ލީގުގައި މިއަހަރު ހަ ޓީމަކުން ވާދަކުރިއިރު، ލީގުގެ ގަދަ ހަތަރު ޓީމުގެ ގޮތުގައި މިލާން ކްރިކެޓް އެކަޑަމީ އާއި ސީބީއެލް ސްޕޯޓްސްގެ އިތުރުން މާލޭ ސްޕޯޓްސް ކްލަބު އަދި ނިއު ސްޓަރ ވަނީ މިއަހަރުގެ ގައުމީ މުބާރާތުން ޖާގަހޯދާފައެވެ.