ރަޝިއާ ކައިރިއަށް ރޭ އައި ބާރުގަދަ ބިންހެލުމާ ގުޅިގެން އުފެދުނު ސުނާމީގެ އަސަރު ޖަޕާނު ކައިރީގައިވާ ރަށްތަކަށް ކުރަން ފަށައިފިއެވެ.
ރޭގެ ވަގުތެއްގައި މި ބިންހެލުން އައިސްފައިވަނީ ރަޝިއާގެ އިރުމަތީ އައްސޭރިފަށުގެ ހިސާބަށެވެ. ރަޝިއާގެ ކަމްޗަޓްކާ ޕެނިންސިއުލާއަށް 8.8 މެގްނިޓިއުޑް ބާރުމިނުގައި އައި މި ބިން ހެލުމުގެ ސަބަބުން އެ ސަރަހައްދުތަކުގެ އިމާރާތްތަކަށްވެސް ވަނީ ވަރަށްބޮޑެތި ގެއްލުންތަކެއް ލިބިފައެވެ. މިއީ 2011 ވަނަ އަހަރަށްފަހު 6 ވަނައަށް ރެކޯޑްކުރެވުނު އެންމެ ބާރުގަދަ ބިންހެލުމެވެ.
ބިންހެލުމާ ގުޅުގެން އުފެދުނު ސުނާމީގެ އަސަރު ރަޝިއާގެ އިތުރުން ޖަޕާނު ކައިރީ ރަށްތަކަށް ވަނީ ކުރަން ފަށާފައެވެ. އެގޮތުން ޖަޕާނުގެ ހުކައިޑޯގެ އައްސޭރިފަށަށް ސުނާމީގައި އުފެދުނު ރާޅުތައް ވަނީ އަރާފައެވެ.
ބިންހެލުމުގެ އަސަރު ޕެސިފިކް ކަނޑުގެ ޤައުމުތަކަށް ކުރާނޭކަމުގެ އިންޒާރު ކަމާބެހޭ ފަރާތްތަކުން ދީފައިވާއިރު، ސުނާމީގެ އަސަރު ސީދާ ކުރާނޭ ޤައުމުތައް އަދި ބުނަން މާ އަވަސްކަމަށް އެމެރިކާގެ ޖިއޯޖިކަލް ސާވޭ ސެންޓަރުން ވަނީ ބުނެފައެވެ.
ނަމަވެސް ސުނާމީގެ އަސަރު ޖަޕާނުގެ އިތުރުން އިންޑޮނޭޝިއާގެ އައްސޭރިފަށާއި، ހަވާއީ، ކެނެޑާގެ ހުޅަނގު ސަރަހައްދުގެ އިތުރުން ދެކުނު އެމެރިކާގެ ޤައުމުތަކަށްވެސް ކުރުން ގާތްކަމަށް ކަމާބެހޭ ފަރާތްތަކުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
