މޯލްޑިވިއަން ޑިމޮކްރެޓިކް ޕާޓީ، އެމްޑީޕީއަށް 20 އަހަރުފުރުން ފާހަގަކުރުމުގެ ގޮތުން ހުކުރުދުވަހުގެ ހަވީރު ސެންޓްރަލް ޕާކްގައި ބާއްވާ ހަރަކާތުގައި ކުޑަކުދިންނަށްވެސް ބައިވެރިވެވޭނޭކަމަށް އެޕާޓީން ބުނެފިއެވެ.

އެމްޑީޕީއަށް 20 އަހަރުފުރުން ފާހަގަކުރުމުގެ ގޮތުން އެޕާޓީން ވަނީ ހުކުރުދުވަހުގެ ހަވީރު 5 ޖަހައިރު، ހުޅުމާލޭ ސެންޓްރަލް ޕާކްގައި "ރަންރީނދޫ" ނަމުގައި މެރަތަންއެއްގޮތަށް ހިނގާލުމެއް ކުރިއަށްގެންދަން ނިންމާފައެވެ. މި ހަރަކާތް ކުރިއަށްގެންދަނީ އެޕާޓީގެ 20 ވަނަ އަހަރީ ދުވަސް ފާހަގަކުރުމުގެ ގޮތުން ކުރިއަށްގެންދިއުމަށް ނިންމާފައިވާ ހަރަކާތްތަކުގެ ފެށުން ފާހަގަކުރުމާވެސް އެކުގައެވެ.

ހަރަކާތާ ބެހޭގޮތުން އެމްޑީޕީ ޤައުމީ މަޖިލީހުގެ މެމްބަރު އަދި މައްޗަންގޯޅި މެދުދާއިރާގެ ރައީސް އަހުމަދު ޝަޒީން ވިދާޅުވީ، ހިނގާލުން ކުރިއަށްދާނީ ކުޑަކުދިންނަށްވެސް ބައިވެރިވެވޭނޭހެންކަމަށެވެ. އެގޮތުން ކުޑަކުދިންނަށް ހަދިޔާދިނުންވެސް ކުރިއަށްދާނޭކަމަށް ޝަޒީން ފާހަގަކުރެއްވިއެވެ. ހަރަކާތަށް ވަދެވޭނީ ސެންޓްރަލް ޕާކްގެ ހުޅަނގުފަރާތުންކަމަށާއި، ހިނގާލުމުގައި ބައިވެރިވާ ފަރާތްތަކަށް ނަން ނޯޓުކުރުމަށްފަހު ބިބް ދޫކުރުން ޕާޓީގެ އޮފީހުންނާއި ހުކުރުދުވަހު ސެންޓްރަލްޕާކުން ކުރިއަށްދާނޭކަމަށްވެސް އޭނާ ވިދާޅުވިއެވެ.

ހަރަކާތާ ބެހޭގޮތުން ވާހަކަދައްކަވަމުން އެމްޑީޕީގެ ކުރީގެ ޗެއާޕާސަން ހަސަން ލަތީފް ވިދާޅުވީ، މިއީ އެމްޑީޕީގެ އަހަރީދުވަހާ ގުޅުވައިގެން ކުރިއަށްގެންދާ އެންމެބޮޑު ހަރަކާތްކަމަށާއި، މި ހަރަކާތުގައި އެމްޑީޕީގެ މެމްބަރުންގެ އިތުރުންވެސް އެޕާޓީއަށް ހެޔޮއެދިވަޑައިގަންނަވާ ހުރިހާ ފަރާތްތަކަށްވެސް އޮންނާނޭކަމަށެވެ. މި ހަރަކާތުގައި ޕާޓީއަށް 20 އަހަރުފުރުން ދައްކުވައިދޭ ހާއްސަ ޓޯޗާއެކު ފޮޓޯ ނެގުންވެސް އޮންނާނޭކަމަށް ހަސަން ލަތީފް ފާހަގަކުރެއްވިއެވެ.

އެމްޑީޕީ ރަން ރީނދޫ ހިނގާލުން ކުރިއަށްދާނީ ސެންޓްރަލް ޕާކްގައި އެދުވަހުގެ 5 ކުން ފެށިގެން 6 ޖެހުމާ ހަމަޔަށެވެ. މި ހިނގާލުމަށްފަހު ތުރާކުނުން ފެށިގެން ރާއްޖޭގެ ހުރިހާ ރަށަކަށް ޓޯޗް ގެންގޮސް ހިނގާލުން ބޭއްވުމަށް ހަމަޖެހިފައިވާކަމަށްވެސް ހަސަން ލަތީފް ވިދާޅުވިއެވެ.

އެމްޑީޕީއަކީ ރާއްޖޭގައި އުފެދުނު ފުރަތަމަ ސިޔާސީ ޕާތީއެވެ. ސްރީލަންކާގެ ކޮޅުނބުގައި ހިނގާދިޔަ ހަރަކާތްތަކަށްފަހު ރަސްމީގޮތުން އެމްޑީޕީ ސިޔާސީ ޕާޓީއެއްގެ ގޮތުގައި ރަޖިސްޓްރީ ކުރެވުނީ 2005 ވަނަ އަހަރުގެ ޖޫންމަހުގެ 26 ވަނަ ދުވަހުއެވެ.