އުމްރާއަށް މީހުންގެންދިއުމަށް ފައިސާ ނެގުމަށްފަހު އެތައް ބަޔަކަށް ލަނޑުދިން މައްސަލާގައި އިސްލާމިކް މިނިސްޓްރީން އަސްކޮއި ގްރޫޕަށް ދޫކޮށްފައި އޮންނަ އުމްރާއަށް މީހުން ގެންދިއުމުގެ ހުއްދަ ހިފަހައްޓައި އިތުރު ފިޔަވަޅުތައް އަޅައިފިއެވެ.

އަސްކޮއި ޓްރެވަލް ސާވިސް ޕްރައިވެޓް ލިމިޓެޑުން ވަނީ އެކުންފުނީގެ ހަވާލުގައި އުމްރާއަށް މީހުންގެންދިއުމަށް އެތައް ބައެއްގެ އަތުން ފައިސާ ނަގައި އެންމެފަހުވަގުތު ލަނޑުދީފައެވެ. މިކަމާ ގުޅިގެން އުމްރާއަށް ދާން އުޅުނު އެމީހުން ވަނީ މައްސަލަ ފުލުހުންނަށާއި އިސްލާމިކް މިނިސްޓްރީއަށް ހުށަހަޅާފައެވެ.

މައްސަލަ ބެލުމަށްފަހު އިސްލާމިކް މިނިސްޓްރީން ވަނީ އަސްކޮއި ޓްރެވަލް ސާވިސްގެ އިތުރުން އެކުންފުނީގެ ހިއްސާދާރުންނަށް ހަރުކަށި ފިޔަވަޅުތަކެއް އެޅުމަށް ނިންމާފައެވެ. އެގޮތުން އަސްކޮޔަށް ދޫކޮށްފައި އޮތް އުމްރާއަށް މީހުން ގެންދިއުމުގެ ހުއްދަ ހިފަހައްޓައި ކުންފުނި ވަނީ ޖޫރިމަނާކޮށްފައެވެ.

- އަސްކޮއި ޓްރެވަލް ކުންފުންޏާއި އަދި އެކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް އުމްރާއަށް މީހުން ގެންދިއުމުގެ ހުއްދަ ނުދިނުން

- މިއަހަރުގެ ޖުލައި އުމްރާ ދަތުރަށް ކުރިން ފައިސާ ދެއްކި މީހުންގެ ފައިސާ ހަވާލުކުރުމަށް އެންގުން

- މައްސަލާގައި އަސްކޮއިގެ މައްޗަށް ޤާނޫނީ ފިޔަވަޅު އެޅުމަށް ފުލުހުންނަށް ހުށަހެލުން

އިސްލާމިކް މިނިސްޓްރީން ބުނީ އަސްކޮއި ކުންފުންޏާ ދެކޮޅަށް އެޅުމަށް ނިންމި ފިޔަވަޅުތައް ތަންފީޒުކުރުމަށް ޓަކައި އިސްލާމިކް މިނިސްޓްރީން ކުރަންޖެހޭ ކަންކަން ފަސްޖެހުމެއްނެތި ކުރަމުންގެންދާނޭ ކަމަށެވެ.

އަސްކޮއިގެ ހަވާލުގައި އުމްރާއަށް ދިއުމަށްޓަކައި އެކުންފުންޏަށް ބައެއް މީހުން 25،000 ރުފިޔާ ދެއްކިއިރު، ލަނޑު ލިބުނުކަން އެނގުނީ ފުރުމަށް ތިން ދުވަހަށްވެފައި ވަނިކޮށް ކުންފުނީގެ ހަބަރެއް ނުވުމުންނެވެ. އަސްކޮއިގެ މިފަދަ މައްސަލަތަކެއް މީގެކުރިންވެސް ވަނީ ފެންމަތިވެފައެވެ. މިދިޔަ ރޯދަ މަހު އުމްރާގެ އަޅުކަން އަދާކުރުމަށް ފައިސާ ދެއްކި ބަޔަކު އުމްރާއަށް ގެންދަން ދެކޮޅު ހެދި މައްސަލާގައި އިސްލާމިކް މިނިސްޓްރީން ވަނީ އަސްކޮއި 130،000 ރުފިޔާއިން ޖޫރިމަނާކޮށްފައެވެ.