ކުރިއަށް އޮތް ފުޓްބޯޅަ ސީޒަން ފެށުމުގެ ގޮތުން ކުޅުނު ޕޯޗުގަލް ސްޕަކަޕްގެ ފައިނަލުގައި ރޭ ވާދަވެރި ކުޅުމަކަށްފަހު ސްޕޯޓިން ލިޒްބަން 1-0 ގެ ނަތީޖާއަކުން ބަލިކޮށް ބެންފީކާ އިން މުބާރާތުގެ ޗެންޕިއަންކަން ހޯދައިފިއެވެ.

ފާއިތުވެދިޔަ ސީޒަނުގެ ލީގު ޗެންޕިއަން ޓީމާއި އެސޯސިއޭޝަން ކަޕްގެ ޗެންޕިއަން ޓީމުގެ މެދުގައި ސީޒަން ހުޅުވުމުގެ ގޮތުން ކުޅޭ ސްޕަކަޕްގެ ޖާގައެއް ބެންފީކާ އިން ހޯދީ މިދިޔަ ސީޒަނުގެ ލީގުގެ ދެވަނަ ޓީމުގެ ގޮތުގައެވެ. އެއީ މިދިޔަ ސީޒަނުގެ ލީގުގެ އިތުރުން ކަޕްގެ ޗެންޕިއަންކަން ވެސް ސްޕޯޓިން ހޯދުމުންނެވެ.

މިދިޔަ ސީޒަނުގައި ލީގު ފަހުމެޗުގައި ބެންފީކާ ކުޅުނު މެޗުން އެއްވަރުވެ، ސްޕޯޓިން ލިޒްބަން ކުޅުނު މެޗުން އެޓީމު މޮޅުވުމުން ސްޕޯޓިންއަަށް ލީގު ޗެންޕިއަންކަން ލިބުނީ ދެ ޕޮއިންޓްގެ ލީޑަކާއެކު އެވެ. އަދި މި ދެޓީމު ކަޕް ފައިނަލުގައި ވާދަކުރި މެޗު 3-1 ގެ ނަތީޖާއަކުން ކާމިޔާބުކުރީ ސްޕޯޓިން ލިޒްބަން އެވެ.

ރޭގެ މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މެޗު ފެށިގެން ފަސްވަނަ މިނެޓުގައި ސްޕޯޓިންގެ މިޑްފީލްޑަރު ޕެޑްރޯ ގޮންކަލްވެސް އެޓީމަށް ލަނޑެއް ކާމިޔާބުކޮށްދިން ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއްކަމަށެވެ.

މީގެ އިތުރުން މިމެޗުން ބެންފީކާ މޮޅުވި ލަނޑު ދެވަނަ ހާފުގެ ފަސްވަަނަ މިނެޓުގައި ކާމިޔާބުކޮށްދިނީ އެޓީމުގެ ގްރީސް ފޯވާޑް ވެންގެލިސް ޕަވްލިޑިސް އެވެ.