ނޭޕާލުގައި ކުރިއަށްދިޔަ ޓޭބަލް ޓެނިސް ވޯލްޑް ޗެމްޕިއަންޝިޕް 2026 ގެ ސައުތު އޭޝިއަން ކޮލިފިކޭޝަންގައި ވާދަކޮށް މުބާރާތުގެ ތިންވަނަ ހޯދި ރާއްޖޭގެ ގައުމީ އަންހެން އަދި ފިރިހެން ޓީމަ މިއަދު ހެނދުނު ރާއްޖެ އައުމުން ވެލާނާ އިންޓަނޭޝަނަލް އެއާޕޯޓުގެ ވީއައިޕީގައި، މަރުުހަބާ ދެންނެވީ ސްޕޯޓްސް ކޮމިޝަނަރު މުހައްމަދު ތޮލާލް އެވެ.

މި ފަހަރުގެ ސައުތު އޭޝިއަން ކޮލިފިކޭޝަންގައި ރާއްޖޭގެ އިތުރުން ދެން ވާދަކުރީ، އިންޑިއާ، ބަންގްލަަދޭޝް، ސްރީ ލަންކާ އަދި މުބާރާތް ބޭއްވި ގައުމު ނޭޕާލް އެވެ.

މި މުބާރާތުގައި ރާއްޖޭގެ އަންހެން ޓީމުން ކުޅުނު ހަތަރު މެޗުގެ ތެރެއިން ބަންގްލަދޭޝް އަދި ސްރީ ލަންކާގެ މައްޗަށް 3-1 ގެ ނަތީޖާއަކުން ކުރިހޯދި ނަމަވެސް، އިންޑިއާ އަދި ނޭޕާލް ވާދަކޮށް ބަލިވީ 3-0 ގެ ނަތީޖާއަކުންނެވެ. އަދި މިޓީމުގައި ހިމެނޭ ކުޅުންތެރިންނަކީ ފާތިމަތު ދީމާ އަލީ، އައިޝަތު ރަފާ ނާޒިމް، މިޝްކާ މުހައްމަދު އިބްރާހީމް އަދި އަލްސާ ނާފިޒެވެ.

މީގެ އިތުރުން ރާއްޖޭގެ ފިރިހެން ޓީމު ސްރީލަންކާ އަތުން 3-1 ގެ ނަތީޖާއަކުން މޮޅުވިއިރު، ބަންގްލަދޭޝް އަތުން މޮޅުވީ ވާދަވެރި ކުޅުމަކަށްފަހު 3-2 ގެ ނަތީޖާއަކުންނެވެ. ނަމަވެސް އިންޑިއާ އަތުން ދިވެހި ޓީމު ބަލިވީ 3-0 ގެ ނަތީޖާއަކުންނެވެ. އަދި މިއީ ގައުމީ ފިރިހެން ޓީމުން ބަންގްލަދޭޝް އާއި ލަންކާ ބަލިކުރި ފުރަތަމަ ފަހަރެވެ.

މީގެ އިތުރުން މިއީ ރާއްޖޭގެ ފިރިހެން ޓީޓީ ޓީމު ދެކުނު އޭޝިއާ މުބާރާތުން މިހާތަނަށް ހޯދި އެންމެ ބޮޑު ކާމިޔާބެވެ. މި ފަހަރުގެ މުބާރާތުގައި ވާދަކުރި ގައުމީ ޓީޓީ ފިރިހެން ޓީމުގައި ހިމެނެނީ މޫސާ މުންސިފް، އަހްޔާރް އަހުމަދު ހާލިދު، މުހައްމަދު ޝައްފާން އިސްމާއިލް އަދި ޒީސްތު ނަސީމް އެވެ.