ދިވެހިރާއްޖޭގެ ކުރިއަށް އޮތް 20 އަހަރުގެ ޤައުމީ ތަރައްޤީގެ ޕްލޭން ތައްޔާރުކުރުމުގެ މަސައްކަތް މިނިސްޓްރީ އޮފް ފިނޭންސް އެންޑް ޕްލޭނިންގ އިން ނެކްސިއާ މޯލްޑިވްސްއާއި ވަނީ ހަވާލުކޮށްފިއެވެ.

ފިނޭންސްގެ ޕްލޭނިން ޑިޕާޓްމަންޓުން ބުނެފައިވަނީ. މި ޕްލޭންގެ މައިގަނޑު މަޤްސަދަކީ ދެމެހެއްޓެނިވި ތަރައްޤީއަށް ރިއާޔަތްކޮށް ޤައުމުގެ ބަދަލުވަމުންދާ އިގްތިޞާދީ، އިޖުތިމާޢީ، ތިމާވެށި އަދި އުމްރާނީ ބޭނުންތަކަށް އަމާޒުކޮށް، ޤައުމީ ފެންވަރުގައި އެންމެ އިސްކަންދޭ ދާއިރާތަކުގެ ދުރުރާސްތާގެ ޕްލޭނެއް އެކުލަވާލުން ކަމަށެވެ. މިގޮތުން، ކުރިއަށްއޮތް 20 އަހަރު ތެރޭގައި ސަރުކާރުގެ ސިޔާސަތުތަކާއި، އިންވެސްޓްމަންޓްތައް އަދި ޤައުމީ ތަރައްޤީގެ ރޭވުންތަކަށް މަގުދައްކައިދޭނެ އިސްތިރާޖީ އޮނިގަނޑަކަށް މިޕްލޭން ވެގެންދާނެއެވެ.

ނެޝަނަލް ޑިވެލޮޕްމެންޓް ޕްލޭން އެކުލަވައިލުމުގެ މިމަސައްކަތް ނެކްސިއާ މޯލްޑިވްސްއިން ކުރިއަށް ގެންދާއިރު، މި ޕްލޭނަކީ ހެކިތަކުގެ މައްޗަށް ބިނާކުރެވިފައިވާ، ޤައުމުގެ ތަފާތު އެކި ބޭނުންތަކަށް އިޖާބަދޭ، އަދި ރާއްޖޭގެ އެކި ރަށްރަށުގައި ދިރިއުޅޭ މުޖުތަމަޢުތަކުގެ ހިޔާލާއި މަޝްވަރާގެ މައްޗަށް ބިނާކުރެވިގެން އެކުލަވާލެވޭ ޕްލޭނެއްކަން ކަށަވަރުކުރާނޭކަމަށް ޕްލޭނިންގ އިން ބުނެއެވެ. މިގޮތުން، ގިނަ ފަރާތްތަކެއްގެ ހިޔާލާއި މަޝްވަރާ ހޯދުމަށްޓަކައި މުޅި ރާއްޖެ ހިމެނޭގޮތަށް މަޝްވަރާކުރުމުގެ މަރުހަލާއެއް ކުރިއަށް ގެންދާގޮތަށް ވަނީ ނިންމާފައެވެ.

އިޤްތިޞާދީ، އިޖުތިމާޢީ އަދި ތިމާވެށީގެ ގޮތުން ރާއްޖެއަށް އެކި ގޮންޖެހުންތަކެއް ކުރިމަތިވެފައިވާއިރު، މިކަމަށް އިސްކަމެއްދިނުމަކީ މި ޕްލޭން އެކުލަވައިލުމުގެ މަގްސަދުތަކުގެ ތެރޭގައި ހިމެނޭ ކަމަށާއި، މިގޮތުން ސަރުކާރުގެ އިންވެސްޓްމަންޓްތަކާއި، ސިޔާސަތުތަށް އިސްލާހުކުރުމާއި، ޤައުމީ ފެންވަރުގެ ނިންމުންތަކަށް މަގުދައްކައިދޭނެ ފުރިހަމަ ދިގު މުއްދަތުގެ އިސްތިރާޖެއް މި ޕްލޭންގައި ހިމެނިގެންދާނޭކަމަށްވެސް ޕްލޭނިން އިން ބުނެއެވެ.

މިކަމާ ގުޅޭގޮތުން ވާހަކަދައްކަވަމުން ނެކެސިއާގެ މެނޭޖިންގ ޑިރެކްޓަރު ވަނީ މިއީ ޤައުމީ މުހިއްމު މަސައްކަތެއް ކަމަށް ވިދާޅުވެ، މިކަން ކުރިއަށްދާނީ ރައްޔިތުންގެ ހިޔާލާއެކުކަމަށް ވިދާޅުވެފައެވެ.

ޕްލޭނިން އިން ބުނީ މި މަސައްކަތް ނެކްސިއާ މޯލްޑިވްސްއާ ހަވާލުކުރީ އެ ކުންފުންޏަކީ ރާއްޖޭގައި 18 އަހަރަށްވުރެ ގިނަ އަހަރުގެ މަސައްކަތުގެ ތަޖުރިބާ އާއި އެކު، ސަރުކާރުގެ ސިޔާސަތުތައް އެކުލަވާލުމާއި، މުއައްސަސާތަކުގެ ހިންގުން ހަރުދަނާކޮށްދިނުމާއި، އިސްތިރާޖީ ރޭވުންތެރިކަމުގެ ދާއިރާއިން އެކި ފެންވަރުގެ ގިނަ މަސައްކަތްތަކެއް ކުރަމުންދާ ކުންފުންޏަކަށް ވާތީކަމަށެވެ.

ދިވެހިރާއްޖޭގެ 20 އަހަރުގެ ޤައުމީ ތަރައްޤީގެ މި ޕްލޭނަކީ ރާއްޖޭގެ ތަރައްޤީގެ ކުރިމަގަށް ކުރެވޭނެ ފައިދާހުރި އަދި ބިނާކުރަނިވި މަސައްކަތަކަށް ވެގެންދާނެކަމަށް ސަރުކާރުން ބުނެއެވެ.