ބޯންމެރޯ ޓްރާންސްޕްލާންޓް ހެދުމަށް މި މަހު އިތުރު ކުދީންތަކެއް ފުރާނެ ކަމަށް ހެލްތް މިނިސްޓްރީން ބުނެފި އެވެ.

ހެލްތް މިނިސްޓަރު އަބްދުﷲ ނާޒިމް އިބްރާހިމް މިއަދު ވަނީ އެ ކުދީންނާއި އެ ކުދީންގެ ބެލެނިވެރީންނާއި ބައްދަލުކޮށްފަ އެވެ. މިނިސްޓްރީން ބުނި ގޮތުގައި ބޯންމެރޯ ޓްރާންސްޕްލާންޓް ހެދުމަށް މި މަހު ހަތް ކުދީން ފުރާނެ އެވެ.

އޭގެ ތެރެއިން ތިން ކުއްޖަކު މިއަދު ފުރާނެ އެވެ. އަދި މާދަމާއާ މި މަހުގެ އެކި ތާރީހުތަކުގައި އިތުރު ހަތަރު ކުއްޖަކު ފުރާނެ އެވެ.

ސަރުކާރުން ވަނީ ޒަކާތު ފަންޑުގެ އެހީގައި ކޮންމެ އަހަރަކު 10 ކުދިން، ބޯންމެރޯ ހެދުމަށް ފޮނުވުމަށް ނިންމާފައެވެ. އެންސްޕާއިން  ބުނީ، ޒަކާތުފަންޑުގެ ހަރަދުގައި މިހާތަނަށް 14 ޕޭޝަންޓަކު ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވާފައިވާ ކަމަށެވެ. މީގެ ތެރެއިން 8 ޕޭޝަންޓަކު ބޯންމެރޯ ޓްރާންސްޕްލާންޓް ހަދައި ނިމިފައިވާއިރު، ބޯންމެރޯ ޓްރާންސްޕްލާންޓް ކުރުމުގެ މަރުހަލާފައި 5 ޕޭޝަންޓަކު އެބަތިއްބެވެ. އެގޮތުން ބޯންމެރޯހެދުމަށް މިހާތަނަށް ޖުމްލަ 8،033،646.37 ރުފިޔާ ހޭދަކުރެވިފައިވާ ކަމަށް އެންސްޕާއިން ބުންޏެވެ.

ސަރުކާރުން ވަނީ ބަލިން ރައްކާތެރިވުމާއި ކޮންޓްރޯލް ކުރުމަށް ކުރިއަށް އޮތް 10 އަހަރުދުވަހުގެ މާސްޓާ ޕްލޭން އިފްތިތާހްކޮށްފައެވެ. މީގެ އިތުރުން ހުޅުމާލޭގައި ތަލަސީމިއާއަށް ހާއްސަ ހޮސްޕިޓަލެއް އެޅުމަށް ކުރަންޖެހޭ މަސައްކަތްތައްވެސް ސަރުކާރުން ވަނީ ފަށާފައެވެ.

މީގެ އިތުރުން ތެލެސީމިއާ ބަލި ކަށަވަރުކުރުމަށްޓަކައި ބައެއް ހާލަތްތަކުގައި ކޮންމެހެންވެސް ހަދަންޖެހޭ ޑީއެންއޭ ޓެސްޓް ސަރުކާގެ ހޮސްޕިޓަލުގައި ހެދޭނޭ އިންތިޒާމް ހަމަޖެއްސުމުގެ މަސައްކަތް ކުރިއަށްދާކަމަށްވެސް ސިއްހީ ވުޒާރާއިން ވަނީ ބުނެފައެވެ.