އައު ޓާމިނަލާއެކު ބޭރުގެ އިންވެސްޓަރުންގެ ޔަގީންކަން އިތުރުވެގެން ހިނގައްޖެ: ސައީދު
ވެލާނާ އިންޓަރނޭޝަނަލް އެއާޕޯޓްގެ އައު ޓާމިނަލާއެކު ޓޫރިޒަމް ސިނާއަތުގައި ހިއްސާވާ ބޭރުގެ އިންވެސްޓަރުންގެ ވޮރަށްބޮޑު އިތުބާރެއް ލިބިގެން ހިނގައްޖެކަމަށް އިގްތިސާދީ ވަޒީރު މުހައްމަދު ސައީދު ވިދާޅުވެއްޖެއެވެ.
ދައުލަތުެގ މީޑިއާއިން ގެނެސްދިން ރާއްޖެ މިއަދު ޕްރޮގްރާމުގައި ވާހަކަދައްކަވަމުން މިނިސްޓަރު ސައީދު ވަނީ ވީއައިއޭ އައު ޓާމިނަލްގެ އޮޕަރޭޝަންތައް ފެށިގެންދިއުމަކީ އެކަމުން މުޅި ރާއްޖޭގެ އިގްތިސާދުގެ އައު ބާބެއް ފެށުންކަމަށް ސިފަކުރައްވާފައެވެ.
މިނިސްޓަރު ވިދާޅުވީ ރާއްޖޭގެ ޓޫރިޒަމް ސިނާއަތުގައި މިވަގުތތު އިންވެސްޓްކޮށްގެން ތިބި ފަރާތްތަކަށް ބަލާއިރު ދުނިޔޭގެ މަޝްހޫރު ހޮޓެލްޗެއިންތަކާއި އެނޫންވެސް މި ސިނާއަތުގައި ހިމެނޭ އެންމެ މަތީ ފަންތީގެ އިންވެސްތަރުން ހިމެނޭކަމަށެވެ.
ވީއައިއޭ އައު ޓާމިނަލް...
މީގެ ކުރިން ރާއްޖެއާ ބެހޭގޮތުން ހެދިގެންދިޔަ ރޭޓިންތަކާއި އެނޫންވެސް ރިޕޯޓްތަކުން އިވިގެންދިޔައީ ރާއްޖޭގެ އިގްތިސާދާމެދު ޔަގީންކަން ނެތްވާހަކަކަން ފާހަގަކުރައްވަމުން މިނިސްޓަރު ވިދާޅުވީ، ވިއައިއޭ އައު ޓާމިނަލްގެ އޮޕަރޭޝަންތައް ފެށުމާއެކު މިއަދު ރާއްޖޭގެ އިގްތިސާދާމެދު ވަރަށްބޮޑު ޔަގީންކަމެއް ލިބިގެން ހިނގައްޖެ ކަމަށެވެ.
ރައީސް ޑރ.މުއިއްޒަށް ވެރިކަން ހަވާލުވިއިރު ރާއްޖޭގެ ރޭޓިންއާ ރާއްޖޭގެ ދަރަންޏާ އިވެމުންދިޔައީ އަބަދުވެސް މިކަހަލަ މާޔޫސްކަމުގެ ވާހަކަތައް. އެހެން އޮއްވައި ދުނިޔޭގެ ބޮޑެތި ޓްރެވަލް އޭޖެންޓުން، ޓްރެވަލް އޮޕަރޭޓަރުން، ބޮޑެތި އެއާލައިންތައް އަދި ހޮސްޕިޓާލިޓީ އިންޑަރސްޓްރީގެ ބޮޑެތި ބްރޭންޑްތަކަށް އާ ޓާމިނަލް އޮޕަރޭޝަން ފެށުމާއެކު ލިބިގެންދިޔައީ ވަރަށްބޮޑު އުފަލެއް، ހަގީގަތުގައި ވަރަށްބޮޑު ޔަގީންކަމެއް ރާއްޖެއާ ދޭތެރޭ ލިބިގެން މިދިޔައީ
މިނިސްޓަރު ސައީދު ވިދާޅުވިއެވެ.
މިނިސްޓަރު ސައީދު ވިދާޅުވީ ވީއައިއޭ ތަރައްޤީކުރުމަށް ދަރަނިނެގުމަކީ މި ޤައުމު ދަރަނިވެރިކުރުވުންކަމަށް ބުނާ ބުނުމަކީ ވަރަށް ހަނި ވިސްނުމެއްގައި ބުނާ ވާހަކައެއް ކަމަށާއި، މިކަމަކީ އޭގެން ފައިސާ ހޯދޭނެ ގޮތްތައް ވަރަށްބޮދަށް ބެެއްލެވުމަށްފަހު ދިރާސާކުރެވިެގން ރައީސް ޔާމީނުގެ ދައުރު ފެށުނު މަސައްކަތެއް ކަމަށެވެ. އެގޮތުން އެމަގުން ކަންކަން ކުރިއަށްގެންދިއުމަށް އޭރު ބައިނަލްއަޤްވާމީ މާލީ އިދާރާތަކުންވެސް ލަފާދީފައިވާކަން މިނިސްޓަރު ފާހަގަކުރެއްވިއެވެ. އެގޮތުން ވީއައިއޭ އައު ޓާމިނަލްގެ މަސައްކަތް ފެށީ އައު ޓާމިނަލަށް ލިބޭ އާމްދަނީން އެތަން ތަރައްޤީކުރުމަށް ނެގި ލޯނު އަނބުރާ ދެއްކޭނޭކަމުގެ ޔަގީންކަން އޮތުމުންކަމަށްވެސް ސައީދު ފާހަގަކުރެއްވިއެވެ.
ވީއައިއޭ އައު ޓާމިނަލްގެ ފުރާމީހުންގެ ދޮރާށި..
މި ޕްރޮގްރާމްގައި ވާހަކަދައްކަވަމުން މިނިސްޓަރު ސައީދު ވަނީ އައު ޓާމިނަލް ފައިސާ އާއި ކޮންޓްރެކްޓަރުންނާއި އެނޫންވެސް ކަންކަން ހަމަޖެހިފައި އޮތްއިރުވެސް މިދިޔަ ސަރުކާރުން އެ މަސައްކަތް އެކަށީގެންވާ ގޮތެއްގައި ކުރިއަށްގެންގޮސްފައި ނުވާތީވެ ވަރަށްބޮޑަށް ފާޑުވިދާޅުވެ ވާހަކަދައްކަވާފައެވެ. އެގޮތުން ޖީއެމްއާރަށް ދިވެހިންގެ ބައިނަލްއަޤްވާމީ ވައިގެ ބަނދަރު ދިން ބަޔަކު ވީއައިއޭއާ ގުޅުވައިގެން ދަރަނީގެ ވާހަކަތައް ދައްކަވާތީވެ މިނިސްޓަރު ވަނީ އެ ބޭފުޅުން މިއަދު ދައްކަވަމުންގެންދަވާ ވާހަކަތަކުގައި އެއްވެސް ކަހަލަ އަސާސެއް ނެތްކަން ފާހަގަކުރައްވާފައެވެ.
ސައުދީގެ ބިންލާދިން ގްރޫއްޕާ ހަވާލުކޮށްގެން ތަރައްޤީކުރި އައު ޓާމިނަލަށް 5 ބިިލިއަނަށްވުރެ ގިނަ ރުފިޔާ ހޭދަވާނޭކަމަށް ސަރުކާރުން ވަނީ ބުނެފައެވެ. އެމްއޭސީއެލުން ބުނީ އައު މި ޓާމިނަލުން އަހަރެއްގެ ތެރޭގައި 7.5 މިލިއަން ފަސެންޖަރުންނަށް ހިދުމަތް ދެވޭނޭކަމަށެވެ.
Advertisement
This content is created and paid for by advertisers and does not involve Voice Journalists
