ސަރުކާރުން ލާމަރުކަޒީ ޤާނޫނަށް ގެނައުމަށް ނިންމާފައިވާ އިސްލާހްގެ ސަބަބުން ކައުންސިލްތައް އިތުރަށް ބަލިކަށިވެގެން ދިއުން ނޫންކަމެއް ނުވާނޭކަމަށް އިދިކޮޅު އެމްޑީޕީން ބުނެފިއެވެ.

އަދުގެ ސަރުކާރުން ވަނީ ލާމަރުކަޒީ ޤާނޫނަށް އިސްލާހް ގެންނަން ނިންމައި، ހުށަހަޅާފައިވާ ބިލަށް އާންމުންގެ ހިޔާލު ހުށައަޅަން ފުރުސަތު ހުޅުވާލާފައެވެ.

މިކަމާ ގުޅިގެން މިއަދު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެޕާޓީގެ ލާމަރުކަޒީ ކޮމިޓީގެ މުގައްރިރު އަލީ ނިޔާޒް ވަނީ އެމްޑީޕީން ދިވެހި ރައްޔިތުންނަށް ގެނެސްދީފައިވާ ލާމަރުކަޒީ ނިޒާމް ފުނޑާލުމުގެ މަސައްކަތް ސަރުކާރުން ކުރަމުންދާކަން ފާހަގަކޮށް، ސަރުކާރަށް ފާޑުވިދާޅުވެފައެވެ. ނިޔާޒް ވިދާޅުވީ ސަރުކާރުން ލާމަރުކަޒީ ނިޒާމަށް ގެނައުމަށް ނިންމާފައިވާ އިސްލާހްތަކާއެކު ކައުންސިލްތައް މާލީގޮތުން އިތުރަށް ބަލިކަށިވެގެންދާނޭކަމަށެވެ.

ނޫސްވެރިްނގެ ބައްދަލުވުމުގައި ނިޔާޒް ވާހަކަދައްކަވަނީ..

ނިޔާޒް ވިދާޅުވީ ކައުްނސިލްތަކުން އާއްމު ވިޔަފާރިތަކަށް ހުރަސްއަޅަމުންދާކަން ފާހަގަކޮށް ސަރުކާރުން ނިންމި އެ ނިންމުމަކީ އެއްވެސް ކަހަލަ ދިރާސާކުރުމެއްނެތި ނިންމި ކަމެއްކަމަށެވެ. ކައުންސިލްތަކުގެ ސަބަބުން ރައްޔިތުން ވިޔަފާރިކުރުމަށް ހުރަސްއެޅޭކަމަށް ސަރުކާރުން ބުނާބުނުމަކީ އެއްވެސްކަހަލަ އަސާސެއްގެ މައްޗަށް ބުރަވެ ދައްކަމުންގެންދާ ވާހަކައެއް ނޫންކަމަށާއި މިއީ ސަރުކާރުން ހަމަ ގަސްތުގައި ކައުންސިލްތައް މާލީގޮތުން އިނދަޖައްލާމުމަށް ކުރާ ކަމެއްކަމެއްކަމަށް ނިޔާޒް ފާހަގަކުރެއްވިއެވެ.

ނިޔާޒް ވިދާޅުވީ މާލީގޮތުން ގޯސްހަދަނީ ހަމައެކަނި ކައުންސިލްތައް އެކަނި ނޫންކަމަށާއި ސަރުކާރު ހިއްސާވާ ކުންފުނިތަކާއި މިނިސްތްރީތައްވެސް އޮތީ ހަމަ އެހާލަތުގައިކަމަށެވެ. އެގޮތުން އޮޑިތަރ ޖެނެރަލް ނެރުއްވަމުންގެންދަވާ މާލީ އޮޑިޓް ރިޕޮތްތަކުން އެކަންކަން ވަރަށް ރަނގަޅަށް ފެންނަމުންދާކަމަށް ނިޔާޒް ވިދާޅުވިއެވެ.

ސަރުކާރުން ލާމަރުކަޒީ ނިޒާމަށް ގެނައުމަށް ނިންމި އިސްލާހަށް އާއްމުންގެ ހިޔާލަށް ހުޅުވާލާފައިވާއިރު، އެ އިސްލާހްތަކަށް ކޮމެންޓްކުރުން މިއަދުގެ 13:30 ހަށް ހަމަވާނެއެވެ. 

ލާމަރުކަޒީ ގާނޫނަށް ގެންނަން ނިންމާފައިވާ އެއް ބަދަލަކީ ކައުންސިލްތަކުން އުފައްދާ ކުންފުނިތަކުން ކުރާ ވިޔަފާރީގެ މަސައްކަތްތައް ވަކި ޝަރުތުތަކަކަށް ފެއްްތުމެވެ. އެ ގޮތުން 10 މިލިއަނަށް ވުރެ ބޮޑު އިންވެސްޓްމަންޓެއް ނުކުރެވޭނެ އެވެ. މީގެ އިތުރުން ކައުންސިލުގެ ދައުރުގެ ފަހު އަހަރުގައި ފިނޭންސް މިނިސްޓްރީއާއި އެލްޖީއޭގެ އިރުޝާދުތަކާއި ކަނޑައަޅާ އުސޫލުތަކާ ހިލާފަށް ދާއިމީ ނުވަތަ ކޮންޓްރެކްޓު މުވައްޒަފުން ވަޒީފާއަށް ނުނެގޭނެ އެެވެ.

އަދި އެ މުއްދަތުގައި ކައުންސިލުގެ އިހުތިސާސްގެ ދަށުގައި ހުރި ބިންތައް ކުއްޔަށް ދޫނުކުރެވޭނެ އެވެ. މީގެ އިތުރުން ކުރިން ޕްލޭން ނުކުރާ ތަރައްގީގެ މަޝްރޫއުތައްވެސް އެ މުއްދަތުގައި ނުފެށޭނެ އެވެ

ލާމަރުކަޒީ ނިޒާމަށް ގެނައުމަށް ނިންމި މި ބަދަލާ ގުޅިގެން ސަރުކާރުން ބުނެފައިވަނީ، މިއީ ލާމަރުކަޒީ ނިޒާމު ހަރުދަނާކުރުމުގެ މުހިންމު ފިޔަވަޅެއްކަމަށެވެ.