ގެދޮރުވެރިޔާ ސްކީމުގެ ދަށުން ދޫކުރުމަށް ނިންމާފައިވާ އެޕާޓްމަންޓްތަކަށް އެޑްވާންސް ފައިސާ އެމީހެއްގެ ޕެންޝަން ފަންޑް މެދުވެރިކޮށް ދެއްކޭނެ ގޮތެއް ވޭތޯ ބެލުމުގެ މަސައްކަތް ފަހި ދިރިއުޅުން ކޯޕަރޭޝަނުން ކުރަމުންގެންދާކަމަށް އެފަރާތުން ބުނެފިއެވެ.

އެސްއެސްޓީވީގައި ވާހަކަދައްކަވަމުން ފަހިދިރިއުޅުން ކޯޕަރޭޝަން (އެފްޑީސީ)ގެ މެނޭޖިންގ ޑިރެކްޓަރު ހަމްދާން ޝަކީލް ވިދާޅުވީ ޕެންށަން ފަންޑް މެދުވެރިކޮސް ޑިޕޮސިޓް ދެއްކުމުގެ އިންތިޒާމްތައް ހަމަޖެއްސުމަށް އެކުންފުނިން މަސައްކަތްކުރަމުންގެންދާކަމަށެވެ. އެގޮތުން ޕެންޝަން އޮފީހާ އެކަމުގެ މުއާމަލާތްތައް ކުރުމަށް މަސައްކަތްކުރަމުންދާކަމަށް ހަމްދާން ވިދާޅުވިއެވެ.

ހަމްދާން ވިދާޅުވީ އެޑްވާންސް ފައިސާ ދެއްކުމަށް ދީފައިވާ ލުއިތަކުގެ ތެރެއިން މިހާރުވެސް އެ ޕޭމަންޓް ދެއްކުމަށް ވަކި މުއްދަތެއް ކަނދައެޅިފައި ނުވާނޭކަމަށާއި، އެ ފަރާތަކަށް ދެއްކުނު ދުވަހަކުން ފައިސާ ދެއްކުނީމައި ތަން ދިނުމުގެ މަސައްކަތް ކުރާނޭކަމަށެވެ. މިހާރުން މިހާރަށް އެޑްވާންސް ފައިސާ ދެއްކިނަމަވެސް އެތަނަސް ބަދަލުވުމުގެ ހުއްދަ އެޗްޑީސީން ދޭނީ ފެނާއި ކަރަންޓްގެ ހިދުމަތް ފަދަ އަސާސީ ކަންކަން ފުރިހަމަ ވުމުން ކަމަށެވެ. ހަމްދާން ވިދާޅުވީ އެކުންފުނިން ކަންކަން ރާވާފައިވަނީ އަންނަ ސެޕްޓެމްބަރުމަހުގެ ނިޔަލަށް ހުރިހާ ކަމެއް ނިމޭގޮތަށްކަމަށެވެ. އެގޮތުން ސެޕްޓެމްބަރުމަހުގެ ނިޔަލަށް އެޑްވާންސް ފައިސާ ދައްކާފަރާތްތަކަށް ފްލެޓްތަކަށް ބަދަލުވެވޭނޭކަން ހަމްދާން ފާހަގަކުރެއްވިއެވެ. 

ގެދޮރުވެރިޔާ ސްކީމްގައި ހިމެނޭ 4،000 އެޕާޓްމަންޓްތަކުގެ ތެރެއިން 3 ކޮޓަރީގެ ފްލެޓްތަކުން 25,000 ރުފިޔާ ނެގުމަށް ނިންމާފައިވާއިރު، 2 ކޮޓަރީގެ އެޕާޓްމަންޓުތަކުން ނެގުމަށް ނިންމާފައިވަނީ 15،000 ރުފިޔާއެވެ. މީގެ ތެރެއިން 3 ކޮޓަރީގެ އެޕާޓްމަންޓުގެ ކުއްޔަކީ މަހަކަށް 9،000 ރުފިޔާއެވެ. އަދި 2 ކޮޓަރީގެ އެޕާޓްމަންޓް ކުއްޔަކީ 7،000 ރުފިޔާއެވެ.

ފަހިދިރިއުޅުން ކޯޕަރޭޝަނުން ދޫކުރާ ފްލެޓްތަކުގެ އެއްބަސްވުން 25 އަހަރަށް ހެދުމަށް ނިންމާފައިވާއިރު، ފްލެޓްތައް މިލްކްކުރެވޭނީ އެ މުއްދަތުގައި ދެއްކުމަށް އޮންނަ ފައިސާ ދައްކައި ހަލާސްކުރުމުންކަމަށް ހައުސިން މިނިސްޓްރީން ވަނީ ކަނޑައަޅާފައެވެ.