ފުޓްބޯޅަ ސީޒަން ސެޕްޓެންބަރުގައި ފަށާއިރު، ރީޖަނަލް ލީގު އެކްޓޯބަރުގައި

ކުރިއަށް އޮތް ފުޓްބޯޅަ ސީޒަން އަންނަމަހު ފަށާގޮތަށް، ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ކަލަންޑަރަށް ބަދަލުގެނެސް އެކަން އިއުލާނުކޮށްފިއެވެ.

ފުޓްބޯޅަ ސީޒަން ފަށާ ތާރީޚަށް ބަދަލުގެނެސް ކަލަންޑަރު ފާސްކޮއްފައި ވަނީ އެފްއޭއެމްގެ އައު ހިނގާ ކޮމިޓީގެ ދެވަނަ ބައްދަލުވުމުގައެވެ. އެ ބައްދަލުވުމުގައި ނިންމާފައިވަނީ ސެޕްޓެމްބަރ 15 ގައި ކުޅޭ ޗެރިޓީ ޝީލްޑް މެޗުން ސީޒަން ފެށުމަށެވެ. އަދި 10 ޓީމާއެކު ދިވެހި ޕްރިމިއާލީގު ސެޕްޓެމްބަރު 18 ގައި ފެށުމަށެވެ.

މީގެ އިތުރުން އޮކްޓޫބަރު 01 ގައި ރާއްޖޭގެ އެކި ސަރަހައްދުތަކުގައި ބާއްވާ ރީޖަނަލް ލީގު ފެށުމަށް އެފްއޭއެމުގެ ކަލަންޑަރުގައި ވަނީ ހިމަނާފައެވެ.

އެފްއޭއެމުން އެކުލަވާލާފައިވާ އުސޫލުގެ ދަށުން ދެބުރަކަށް ބަލާހައިގެ2ން މި ފަހަރު ސީޒަންގައި ކުޅޭނީ 90 މެޗެވެ. ލީގުގެ ގަދަ 6 ޓީމަށް އަންނަ އަހަރުގެ ލީގުން ޖާގަ ކަށަވަރުވާއިރު އެންމެ މަދުން ޕޮއިންޓް ހޯދާ ދެ ޓީމަށް ކުރީގެ ސެކަންޑް ޑިވިޝަންގެ ގޮތުން މިއަހަރުންފެށިގެން ބާއްވާ ރީޖަނަލް ލީގުގެ މާލޭ ލީގުގަށް ރެލިގޭޓް ވާނެއެވެ. ލީގުގެ 7 ވަނަ އާއި 8 ވަނައަށްދާ ދެޓީމު ކުޅެން ޖެހޭނީ މާލޭ ލީގުގެ ކޮލިފިކޭޝަން ރައުންޑުގައެވެ.

ޕްރިމިއާ ލީގުގެ އުސޫލުގައިވާގޮތުން ލީގުގެ 7 ވަނަ ޓީމާއި 8 ވަނަ ޓީމާއި، ނޯތު ލީގާއި ސެންޓްރަލް ލީގު އަދި ސައުތު ލީގާއި މާލޭ ލީގުގެ ޗެމްޕިއަންކަން ހޯދާ ޓީމުތައް ހިމެނޭ ގޮތަށް 6 ޓީމުގެ މެދުގައި ޕްރިމިއާ ލީގުގެ ކޮލިފައިންގައި ވާދަކުރަން ޖެހޭނެއެވެ. މި ކޮލިފިކޭޝަނުގެ ގަދަ 4 ޓީމު 2026/2027ގެ ލީގަށް ކޮލިފައިވާނެއެވެ.