ގަދައިގައި ކަނޑުމައްޗަށް ނިކުމެ އުޅެނިކޮށް ހދ.ކުމުންދޫ ކައިރިއަށް ލޯންޗެއް ބަންޑުން ޖަހާލައި ކަނޑުވި މީހުން އެމްއެންޑީއެފުން ސަލާމަތްކޮށްފިއެވެ.
އެމްއެންޑީއެފުން ބުނީ އެ ލޯންޗު، ހދ. ކުމުންދޫ ކައިރިން ބަންޑުން ޖަހާލި ކަމުގެ މަޢުލޫމާތު އެމްއެންޑީއެފް ނޮދަން އޭރިއާ ކޮމާންޑް، ކޯސްޓްގާޑު ފަސްޓް ސްކޮޑްރަންއަށް ލިބުނީ މިއަދު ހެނދުނު 08:45 ހާއިރު ކަމަށެވެ. މަޢުލޫމާތު ލިބުމާ އެކު، ކޯސްޓްގާޑު ހާބަރކްރާފްޓް ލޯންޗު އެ ސަރަހައްދަށް ގޮސް، ކަނޑުވެފައި ތިބި ހަތަރު މީހުން ސަލާމަތްކޮށްފައިވާކަމަށް ބުންޏެވެ. އޭގެ ތެރެއިން ދެ މީހެއްގެ ހާލު ދެރަވުމާ ގުޅިގެން އެމްއެންޑީއެފް ނޮދަން އޭރިއާ ކޮމާންޑް، ކޯސްޓްގާޑު ފަސްޓް ސްކޮޑްރަންގެ ހާބަރކްފާރްޓްގައި ވަނީ ހދ. ކުޅުދުއްފުއްޓަށް ގެންގޮސްދީފައެވެ. އެ ދެމީހުންނަށް ކުޅުދުއްފުށީ ރީޖަނަލް ހޮސްޕިޓަލުގައި މިހާރު ދަނީ ފަރުވާ ދެމުންނެވެ.
މި ލޯންޗުން ކަނޑުވި ބާކީ ދެ މީހުން، ވެރިފަރާތުން ފޮނުވި ސަޕްލައި ދޯންޏަކަށް ނަގާފައިވާކަމަށްވެސް އެމްއެންޑީއެފުން ވަނީ ބުނެފައެވެ.
ކުމުންދޫ ކައިރިއަށް ލޯންޗެއް ބަންޑުން ޖަހާލިއިރު މިއީ 12 ގަޑިއިރުގެ ތެރޭގައި ކަނޑުމަތީގައި ހިނގި މިފަދަ ދެވަނަ ހާދިސާއެވެ. ރޭ މާލެ އަތޮޅު ގުރައިދޫ ކައިރިން ޑިންގީއެއް ބަންޑުން ޖަހާލައި 17 ބިދޭސީން ކަނޑުވުމުގެ ހާދިސާއެއް ވަނީ ހިނގާފައެވެ. ނަމަވެސް ކަނޑުވި އެންމެން ސަލާމަތްވިކަމަށް ފުލުހުން ވަނީ ބުނެފައެވެ.
މިދުވަސްވަރަކީ މޫސުން ގޯސް އަދި ކަނޑުގަދަ ދުވަސްވަރެއްކަމުން މޫސުމާ ބެހޭ މައުލޫމާތު ހޯދައިގެން ނޫނީ ކަނޑުމައްޗަށް ނޭރުމަށް މޫސުމާ ބެހޭ ގައުމީ އިދާރާ އަދި އެމްއެންޑީއެފުން ވަނީ އިލްތިމާސްކޮށްފައެވެ.
Advertisement
This content is created and paid for by advertisers and does not involve Voice Journalists
