އަސާސީ މުދަލުގެ ބާވަތްތައް އެތެރެކުރުމަށް އެކަނިވެސް ހުސްވި ޖުލައިމަހުގެ ނިޔަލަށް 217 މިލިއަން ޑޮލަރު ދޫކުރެވިފައިވާކަމަށް މަރުކަޒީ ބޭންކުން ހާމަކޮށްފިއެވެ.

މޯލްޑިވްސް މަނިޓަރީ އޮތޯރިޓީ، އެމްއެމްއޭއިން މިއަދު ބުނެފައިވަނީ، މިއަހަރުގެ ފުރަތަމަ 7 މަސްދުވަހުގެ ތެރޭގައި ރާއްޖެއަށް ތެލާއި، ކާޑު އަދި ބޭހާއި މެޑިކަލް އިކުއިޕްމަންޓް އެތެރެކުރުމަށްޓަކައި ސްޓޭޓް ޓްރޭޑިންގ އޯގަނައިޒޭޝަނަށް 274.3 މިލިއަން އެމެރިކާ ޑޮލަރު ވިއްކާފައިވާކަމަށެވެ. އެސްޓީއޯއަކީ ރާއްޖެއަށް ބޭނުންވާ އަސާސީ މުދާ އެތެރެކުރާ ކުންފުންޏެވެ.

ދައުލަތަށް ލިބޭ ބޭރުފައިސާގެ މުއާމަލާތްތަކާ ގުޅޭގޮތުން މަރުކަޒީ ބޭންކުން މިއަދު ބުނީ، މިދިޔަ އަހަރާ އަޅާބަލާއިރު، މިއަހަރުގެ ފުރަތަމަ ހަތް މަސްދުވަސް ނިމިގެންދިޔައިރު، ސަރުކާރަށް ޓެކުހާއި ފީގެ ގޮތުގައި ލިބުނު ބޭރު ފައިސާގެ އާމްދަނީ 30 އިންސައްތަ އިތުރުވެފައިވާކަމަށެވެ. ދައުލަތުގެ ޓެކްސް އިދާރާގެ ތަފާސްހިސާބުތަކަށް ބަލާއިރު، ޖޫންމަހުގެ ނިޔަލަށް ބޭރުފައިސާއިން ލިބުނު އަދަދު އުޅެނީ، 772.5 މިލިއަން ޑޮލަރުގައެވެ. މިދިޔަ އަހަރުގެ ފުރަތަމަ ހަމަސްދުވަހު ލިބިފައިވަނީ، 562.1 މިލިއަން ޑޮލަރެވެ.

މަރުކަޒީ ބޭންކުން ބުނީ ބޭރު ފައިސާއާބެހޭ ޤާނޫނުގެ ދަށުން ވިޔަފާރިތަކުން ބޭންކުތަކަށް މާރުކުރާ އަދަދުގެ ތެރެއިން، ބޭންކުތަކުން އެމްއެމްއޭއަށް ވިއްކަންޖެހޭ އަދަދުގެ ގޮތުގައި ޖުލައި މަހުގެ ނިޔަލަށް ޖުމްލަ 247.2 މިލިއަން އެމެރިކާ ޑޮލަރު ލިބިފައިވާކަމަށެވެ. ދައުލަތުގެ ރިޒަރވްއިން ކޮށްފައިވާ ހޭދަތަކަށް ބަލާއިރު، ސަރުކާރުގެ ބޭރުގެ ދަރަނި އަދާކުރުމަށް އަހަރުގެ މިހާތަނަށް 212.6 މިލިއަން އެމެރިކާ ޑޮލަރު ހޭދަކޮށްފައިވާއިރު، މިއީ މިދިޔަ އަހަރާ އަޅާބަލާއިރު 60 އިންސައްތަ އިތުރުވުމެކެވެ.

ދަރަނި ދެއްކުމުގެ އިތުރުން ރިޒާވްގެ ތެރެއިން ރާއްޖެއިން ބޭރަށް ދަތުރުކުރާ ކޮންމެ ދިވެއްސަކަށް 500 އެމެރިކާ ޑޮލަރުގެ މަގުން ނަގުދު ފައިސާ، ދީފައިވާއިރު، އުމްރާ ގްރޫޕްތަކަށް ވިއްކާ އަދަދު ހިމެނޭގޮތަށް ޖުލައި މަހުގެ ނިޔަލަށް ޖުމްލަ 217.0 މިލިއަން އެމެރިކާ ޑޮލަރު ދޫކުރެވުނުކަމަށް އެމްއެމްއޭއިން ބުނެއެވެ.

އެމްއެމްއޭއިން ބުނީ ދިވެހި ރުފިޔާގެ އެކްސްޗޭންޖް ރޭޓަށް ކުރަމުންދާ ނޭދެވޭ އަސަރު ކުޑަކުރުމަށާއި ރާއްޖޭގެ ރިޒަރވްގެ ހާލަތު އިތުރަށް ރަނގަޅު ކުރުމަށްޓަކައި އެމްއެމްއޭއިން މިއަހަރުގެ ތެރޭގައި ހަރުދަނާ ފިޔަވަޅުތަކެއް އަޅާފައިވާކަމަށެވެ. އެގޮތުން އެންމެ ފާހަގަކޮށްލެވެނީ ބޭރުފައިސާ ވިއްކުމުގެ ގަވާއިދަށް ގެނައި ބަދަލެވެ.