އުރީދޫ މޯލްޑިވްސްއިން ހަބޭސް ބޮޑުބެރު ގްރޫއްޕާ ގުޅިގެން ބޮޑުބެރު ކްލާސްތަކެއް ހިންގުމަށް ތައްޔާރުވެއްޖެއެވެ.

އުރީދޫއިން ބުނީ މިއީ އެކުންފުންޏަށް 20 އަހަރުފުރުމުގެ މުނާސަބާ ފާހަގަކުރުމާ ގުޅުވައިގެން ކުރިއަށްގެންދިއުމަށް ނިންމި ކްލާސްތަކެއްކަމަށެވެ. ބޮޑުބެރު ކްލާސްތައް 4 ހަފްތާގެ ނިޔަލަށް ކުރިއަށްގެންދިއުމަށް ވަނީ ނިންމާފައެވެ. 

މި ޕްރޮގްރާމުގެ މަޤްޞަދަކީ ހަބޭސް ބޮޑުބެރުގެ ހުނަރުވެރި އިރުޝާދުގެ ދަށުން ދިވެހި ސަގާފަތުގެ މުއްސަނދި އަދު ތަރިކައެއް ކަމަށްވާ ބޮޑުބެރުގެ ވައްޓަފާޅު ބައިވެރިންނަށް ދަސްކޮށްދިނުންކަމަށް އުރީދޫއިން ބުނެއެވެ. ހަބޭސްއަކީ އުރީދޫ މޯލްޑިވްސްގެ ބްރޭންޑް އެމްބެސެޑަރެވެ.

ކްލާސްތައް ކުރިއަށްގެންދިއުމަށް ނިންމާފައިވަނީ، އޮގަސްޓް 16، 23، 30 އަދި ސެޕްޓެމްބަރުމަހުގެ 6 ދުވަހުއެވެ. ކްލާސްތައް އުރީދޫ މޯލްޑިވްސް ހެޑްކުއާޓާސް، 4 ވަނަ ފަންގިފިލާގައި ކުރިއަށްގެންދިއުމަށް ނިންމާފައިވާއިރު 20 ފަރާތަކަށް ބައިވެރިވުމުގެ ފުރުސަތު ވަނީ ހުޅުވާލާފައެވެ.

އުރީދޫއިން ބުނީ ކްލާހުގެ ބައިވެރިންގެ އަތުން އެއްވެސް ފީއެއް ނުނަގާނޭ ކަމަށާއި، ބައިވެރިވެވޭނީ ރަޖިސްޓަރ ކުރާ އެންމެ ފުރަތަމް 20 ބައިވެރިންނަށް ކަމަށެވެ.. ރަޖިސްޓްރީވުމުގެ މުއަދަތު އޮގަސްޓް 16 ވަނަ ދުވަހަށް ހަމަވާއިރު، ބައިވެރިންނާއި މުއާމަލާތް ކުރެވޭނީ ރަޖިސްޓްރީކުރުމަށް ބޭނުންކުރެވޭ ފޯން ނަންބަރު ނުވަތަ އީމެއިލް މެދުވެރިކޮށެވެ.

އުރީދޫ ރާއްޖޭގެ މުވާސަލާތީ ޚިދުމަތް ދެމުންދާތާ 20 އަހަރު ފާހަގަކުރަމުންދާއިރު، މި ބޮޑުބެރު ކުލާހަކީ އުރީދޫއިން ދިވެހި ތަރިކައަށް އަދި ދިވެހިވަންތަ ކަންކަން ކުރިއެރުވުމަށްދޭ އަހަންމިއްޔަތު ފާހަގަ ކުރެވޭ ކަމެއްކަމަށް އުރީދޫއިން ބުނެއެވެ.