ގާނޫނުއަސާސީއަށް 17 އަހަރު ފުރޭއިރު، އެ ގާނޫނުއަސާސީގެ އަސާސީ އޮނިގަނޑު ރޫޅާލާފައިވާ ކަމަށާ އެހެން ކަމުން ގާނޫނުއަސާސީގެ ހަމަތައް ނެގެހެއްޓުމަށް ލިބޭ ފަހު ފުރުސަތުގެ ބޭނުން ހިފަން ޖެހޭ ކަމަށް އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެ އެވެ.
ދިވެހީން މިހާރު އަމަލު ކުރަމުންދާ އާ ގާނޫނު އަސާސީ -- ފެހި ގާނޫނު އަސާސީއަށް މިއަދު ވަނީ 17 އަހަރު ފުރިފަ އެވެ. ކުރީގެ ރައީސް މައުމޫން އަބްދުލްގައްޔޫމްގެ ވެރިކަމގައި އާ ގާނޫނު އަސާސީ ތަސްދީގު ކުރެއްވީ އޮގަސްޓް މަަހުގެ ހަތްވަނަ ދުވަހު އެވެ.
އެ މުނާސަބާ ފާހަގަ ކުރައްވާ އެކްސްގައި ކުރެއްވި ޕޯސްޓެއްގައި ފައްޔާޒް ވިދާޅުވީ ލާމަރުކަޒީ އުސޫލުން ރާއްޖޭގެ ރަށްތައް ހިންގުމަކީ ގާނޫނުއަސާސީ ލާޒިމުކުރާކަމަކަށްވާއިރު، ކައުންސިލްތަކުގެ ބާރު ކަނޑުވާލުމަކީ ގާނޫނުއަސާސީގެ 8 ވަނަ ބާބުގެ ބާރު ކަނޑުވާލުން ކަމަށެވެ. ފައްޔާޒު އެ އިޝާރާތް ކުރައްވަނީ ކައުންސިލްތަކުގެ މާލީ ބާރުވެރިކަން ހަނިކޮށް އިއްޔެ މަޖިލީހުން ފާސްކުރި ގާނޫނަށެވެ.
މީގެ އިތުރުން ފަނޑިޔާރު ގޭގެ ބާރު ކަނޑުވާލާފައިވާ ކަމަށް ވިދާޅުވި އެވެ. އަދި ވިދާޅުވީ ދައުލަތުގެ މާލިއްޔަތު ހިންގުމަށް ގާނޫނުއަސާސީގައި ކަނޑައަޅާފައިވާ އުސޫލުތަކާ ސަރުކާރު ހިލާފުވެއްޖެ ކަމަށެވެ.
މިހާރު ވެރިކަމުގައި ތިއްބެވި ބޭފުޅުން ގާނޫނުއަސާސީއަކީ ކުޅޭކުޅޭ އެއްޗަކަށް ހައްދަވައިފި ކަމަށްވެސް ވިދާޅުވި އެވެ.
އެހެން ކަމުން ދިވެހި ރައްޔިތުންގެ ބުރަ މަސައްކަތުން ހޯދި ގާނޫނުއަސާސީގެ ހަމަތައް ނެގެހެއްޓުމަށް ލިބޭ ފަހު ފުރުސަތުގެ ބޭނުން ހިފަން ޖެހޭ ކަމަށާ އެއީ ކުރިއަށް އޮތް ލޯކަލް ކައުންސިލް އިންތިހާބު ކަމަށް ފައްޔާޒު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
