ކުރިއަށް އޮތް ސީޒަނަށް ތައްޔާރުވުމުގެ ގޮތުން ޗެލްސީ ކުޅުނު އެކުވެރިކަމުގެ ފުރަތަަމަ މެޗުގައި، ހުކުރު ދުވަހުގެ ރޭ އަމިއްލަ ދަނޑުގައި ޖަރުމަނުގެ ބަޔާ ލެވަކޫސަން އާއި ވާދަކޮށް ފަސޭހަކަމާއެކު 2-0 ގެ ނަތީޖާއަކުން ޗެލްސީ މޮޅުުވެއްޖެއެވެ.

ޗެލްސީގެ ސްޓޭމްފޯޑް ބްރިޖްގައި ކުޅުނު މިމެޗުގެ ފުރަތަމަ ހާފުގައި މޮޅަށް ކުޅެ ޗެލްސީ އިން މެޗު ޑޮމިނޭޓްކުރިއިރު. މިހާފުގައި އެޓީމުން ވަނީ ލެވަކޫސަންގެ ގޯލަށް 14 ހަމަލާއެއް ފޮނުވާލާފައެވެ. އަދި އޭގެ ތެރެއިން ހަ ހަމަލާއެއް ގޯލާއި އަމާޒިވިއިރު ޗެލްސީ އިން މެޗުގެ ލީޑުހޯދީ ފުރަތަމަ ހާފުގެ 18 ވަނަ މިނެޓުގައެވެ.

މިލަނޑު އެޓީމަށް ކާމިޔާބުކޮށްދިނީ ދާދި ފަހުން އެޓީމާއި ގުޅުނު ބުރެޒިލްގެ ޒުވާން ފޯވާޑް އެސްޓެވާއޯ އެވެ. މިއީ އުމުރުން 18 އަހަރުގެ ފޯވާޑް ޗެލްސީގެ ޖާޒީގައި ކުޅުނު ފުރަތަމަ މެޗެވެ. އަދި މިހާފުގައި އެސްޓެވާއޯގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ ފެޓީމުން ކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން ޗެލްސީ ކުރީގައި އޮވެގެންނެވެ.

މެޗުގެ ދެވަނަ ހާފުގައި ވެސް ގިނަވަގުތު ބޯޅަ ހިފަހައްޓައިގެން މޮޅަށް ކުޅެ ޗެލްސީ އިން މެޗު ޑޮމިނޭޓްކުރިއިރު، މިހާފުގައި އެޓީމުން ލެވަކޫސަންގެ ގޯލަށް 10 ހަމަލާއެއް ފޮނުވާލިއެވެ. އަދި އެޓީމުން ލީޑު ފުޅާކުރި ލަނޑު މެޗުގެ 90 ވަނަ މިނެޓުގައި ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނިކުތް ބްރެޒިލްގެ ފޯވާޑް ޖޮއާއު ޕެޑްރޯ އެވެ.

މިލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން ޗެލްސީ ކުރީގައި އޮވެގެންނެވެ. އަދި މިއީ އެރިކް ޓެންހާގް ލެވަކޫސަންގެ ކޯޗުކަމާއި ހަވާލުވި ފަހުން އެޓީމު ކުޅުނު އެކުވެރިކަމުގެ ފަސް މެޗުގެ ތެރެއިން އެޓީމު ބަލިވި ދެވަނަ މެޗެވެ. އަދި އަނެއް ތިން މެޗުން ލެވަކޫސަން ވަނީ މޮޅުވެފައެވެ