ޔޫރަޕްގެ ފުޓްބޯޅަ މައި އިދާރާ ޔުއެފާ އިން ބާސެލޯނާގެ ޒުވާން ފޯވާޑް ލަމީން ޔަމާލް އަދި ތަޖްރިބާކާރު ފޯވާޑް ރޮބަޓް ލެވަންޑޮވްސްކީ މިއިން ކޮންމެ ކުޅުންތެރިއަކު 5،000 ޔޫރޯ އިން ޖޫރިމަނާކޮށްފިއެވެ.

މީޑިއާ ރިޕޯޓްތައް ބުނާގޮތުގައި ޔުއެފާ އިން މިދެކުޅުންތެރިން ޖޫރިމަނާ ކޮށްފައިވަނީ މިދިޔަ ސީޒަން ޗެންޕިއަންސް ލީގުގެ ސެމީފައިނަލް ދެވަނަ ލެގުގައި އިންޓަ މިލާން ދަނޑުގައި ކުޅެ 4-3 ގެ ނަތީޖާއަކުން ބާސެލޯނާ ބަލިވި މެޗަށް ފަހު އެންޓި-ޑޯޕިންގ ގަވާއިދަށް މި ދެކުޅުންތެރިން އިޚްތިރާމް ނުކުރުމުގެ ސަބަބުންނެވެ.

ޔުއެފާއި ހަވާލާދީ މީޑިއާތަކުން ރިޕޯޓްކޮށްފައިވާ ގޮތުގައި މި ދެކުޅުންތެރިންވެސް ޖޫރިމަނާ ކޮށްފައިވަނީ ޑޯޕިންގ ކޮންޓްރޯލް އޮފިސަރުގެ އިރުޝާދުތަކާ ޚިލާފުވެ ޑޯޕިންގ ކޮންޓްރޯލް ސްޓޭޝަނަށް ދިއުން ލަސްވުމުގެ ސަބަބުންނެވެ.

މިމެޗުގައި ޔަމާލްގެ ފަރާތުން ތަފާތު މޮޅު ކުޅުމެއް ފެނިގެން ގޮސްފައިވާއިރު، މެޗަށްފަހު ޑޯޕިން ޓެސްޓް ހެދުމަށް ޔަމާލް އިންކާރުކުރުމާއެކު ބައެއް ފަރާތްތަކުން ވަނީ ޔަމާލް ޑޯޕިންގެ ޤަވާއިދުތަކާއި ޚިލާފުވެފައިވާކަމުގެ ތުހުމަތުގެ އިނގިލި ދިއްކުރަމުންނެވެ.

މީގެ އިތުރުން، ބާސެލޯނާގެ ކޯޗު ހާންސި ފްލިކް ވެސް ވަނީ 20،000 ޔޫރޯގެ ޖޫރިމަނާއަކާއި އެކު ޔުއެފާ ކްލަބް މުބާރާތްތަކުގެ އެއް މެޗަށް ސަސްޕެންޑްކޮށްފައެވެ. މި އަދަބު ދީފައިވަނީ ޔުއެފާގެ އާންމު އުސޫލުތަކާ ޚިލާފުވުމުގެ އިތުރުން އަސާސީ އަޚްލާޤީ މިންގަނޑުތަކާ ޚިލާފުވުމުގެ ސަބަބުންނެވެ.

މީގެ އިތުރުން ފްލިކްގެ އެސިސްޓެންޓް މާކަސް ސޯގް ވެސް ވަނީ ޖޫރިމަނާކުރުމުގެ އިތުރުން އެއް މެޗަށް ސަސްޕެންޑްކޮށްފައެވެ. އަދި މި ހުރިހާ އަދަބެއްވެސް ވަގުތުން ތަންފީޒު ކުރެވޭނެއެވެ. އަދި ބާސެލޯނާގެ ދެން އެންމެ އަވަހަށް ކުޅޭ ޗެންޕިއަންސް ލީގު މެޗުގައި ފްލިކްގެ އިތުރުން ސޯގްއަށް ވެސް ބެންޗުގައި ތިބުމުގެ ފުރުސަތެއް ނުލިބޭނެއެވެ. އަދި އެމެޗުގައި ބާސެލޯނާގެ ސަޕޯޓަރުން ދަނޑަށް އެއްޗެހި އުކުމުގެ ސަބަބުން 5،250 ޔޫރޯ އަދި ފަޓާސް ޖެހުމުގެ ސަބަބުން 2،500 ޔޫރޯ އިން އެކުލަބް ވަނީ ޖޫރިމަނާ ކޮށްފައިވެއެވެ.