އިސްލާމިކް މިނިސްޓްރީގެ ޕާމަނެންޓް ސެކްރެޓަރީގެ މަގާމުން ވަކިކުރި މުސްއަބް އަބްދުﷲ އަށް މިލިއަނަކަށްވުރެ ގިނަ ރުފިޔާ ދެއްކުމަށް ސިވިލްކޯޓުން ހުކުމްކޮށްފިއެވެ.

ސިވިލްކޯޓުން މިދިޔަ ބްރާސްފަތިދުވަހު މިގޮތަށް ހުކުމްކޮށްފައިވަނީ، 2019 ވަނަ އަހަރުގެ ސެޕްޓެމްބަރުމަހުގެ 10 ވަނަ ދުވަހު  މުސްއަބް، އިސްލާމިކް މިނިސްޓްރީގައި އޭނާ ހުންނެވި މަގާމުން ވަކިކުރުމާ ގުޅިގެން ލިބުނު ގެއްލުމުގެ ބަދަލުގެ ހޯދުމަށް އެ ކޯޓަށް ހުށަހެޅި މައްސަލައާ ގުޅިގެންނެވެ.

ސިވިލް ސާވިސް ކޮމިޝަނުން މުސްއަބް ވަޒީފާއިން ވަކިކުރުމުން އޭނާ ވަނީ، އެއީ ގާނޫނާ ހިލާފަށް ކުރިކަމެއް ކަނޑައަޅައިދިނުމަށް އެދި ހައިކޯޓުގެ އިތުރުން ސްޕްރީމް ކޯޓަށްވެސްމިދިޔަ އަހަރު މައްސަލަ ހުށަހަޅާފައެވެ. ސިވިލް ސާވިސް ކޮމިޝަނާ ދެކޮޅަށް ކުރި ދައުވާގައި އެކޯޓުގެ ނިންމުން އައިސްފައިވަނީ އޭނާއާ އެއްކޮޅަށެވެ. އަދި މި މައްސަލާގައި ރާއްޖޭގެ އެންމެ މަތީ ކޯޓް، ސްޕްރީމް ކޯޓަށް ހުށަހެޅި މައްސަލައިގައި އެކޯޓުންވެސް ވަނީ ހައިކޯޓުގެ ހުކުމް ދަމަހައްޓާފައެވެ.

ސިވިލް ސާވިސް ކޮމިޝަނުން އޭރު މުސްއަބް ވަކިކޮށްފައިވަނީ އޭނާގެ މައްޗަށް ހުށަހެޅުނު ދެ މައްސަލައެއް ބެލުމަށްފަހުއެވެ. އެއް މައްސަލައަކީ އިސްލާމިކް މިނިސްޓްރީގައި ނެތް މުއައްޒަފަކު ޕޭރޯލްގައި ރަޖިސްޓްރީކޮށް ހިމަނައި އޭނާއަށް މުސާރަދިން މައްސަލައެވެ. އަނެއް މައްސަލައަކީ ދައުލަތުގެ ސިއްރު ލިއުމެއް ސޯޝަލް މީޑިއާއަށް ލީކްކޮށްލިކަމަށް ބުނާ މައްސަލައެވެ. މީގެ ތެރެއިން މުސްއަބް ވަޒީފާއިން ވަކިކުރުމަށް ނިންމާފައިވަނީ ސިއްރު ލިޔުން އާއްމުކުރި މައްސަލާގައެވެ.

ސިވިލްކޯޓުން މިއަދު ސިވިލް ސާވިސް ކޮމިޝަނާ ދެކޮޅަށް ކުރި ހުކުމްގައި ބުނެފައިވަނި، ޝަރީއަތަށް ހަރަދުވި 40،000 ރުފިޔާ އާއި މުސްއަބް ވަޒީފާއިން ވަކިކުރި ދުވަހުން ފެށިގެން ވަޒީފާގެ އެއްބަސްވުމުގެ މުއްދަތުގައިވާ 2 އަހަރާއި 10 މަހުގެ އިތުރުން 15 ދުވަހުގެ މުސާރައާ އިނާޔަތުގެ ގޮތުގައި ލިބެންޖެހޭ 1.14 މިލިއަން ރުފިޔާ ސެޕްތެމްބަރުމަހުގެ 7 ވަނަ ދުވަހުގެ ކުރިން މުސްއަބަށް ދައްކައި ހަލާސްކުރަންޖެހޭނޭ ކަމަށެވެ.